Ifipusho Ukufuma ku Babelenga

Abena Kolose 1:16 basosa pa lwa Mwana wa kwa Lesa ukuti “fyonse fyalengeelwe muli wene, kabili fyalengeelwe wene.” Ni mu mano nshi fyonse “fyalengeelwe” Umwana wa kwa Lesa, Yesu?

Yehova abomfeshe Umwana wakwe uwafyalwa eka nga kabomba mukalamba mu kulenga ifintu fyonse, e kuti fyonse ukufumyako fye Yesu. (Amapinda 8:27-30; Yohane 1:3) Apo, Umwana alasanga insansa muli ifi fintu, e ico kuti casoswa ukuti “fyalengeelwe” wene.

Twalishiba ukuti abafyashi ba buntunse benekela ukusanga insansa mu bufyashi bwabo, e kutila, mu bana babo abaume na banakashi, kabili ilingi line balashisanga. E co, ipinda lya mu Baibolo lilanda pa “mwana mwaume uo [wishi] acankilwa.” (Amapinda 3:12; 29:17) Yehova Lesa nao alesekelela muli Israele ilyo abantu bakwe bali no busumino. (Amalumbo 44:3; 119:108; 147:11) Na kabili alasekelela pa busumino bwa bantu bakwe aba cishinka ukufika na ku nshita shesu.—Amapinda 12:22; AbaHebere 10:38.

E co, cali icalinga ukuti Lesa alenge kabomba munankwe, Yesu, ukusanga insansa mu fyo alebomba. Na kuba, Amapinda 8:31, NW yatila Umwana “aleanga pano nse pa calo cakwe, no kupekelwa abana ba bantu.” E co Abena Kolose 1:16 basosela ukuti: “Fyonse fyalengeelwe muli wene, kabili fyalengeelwe wene.”