Ishina lya kwa Lesa Lilalumbulwa ku Bekashi ba mu Fyalo Fyabela pa Kati ka Afrika

ABENGI mu fyalo fyabela pa Kati ka Afrika balisumina muli Lesa. Tabatwishika ukuti Lesa e Kalenga wa fintu fyonse. (Ukusokolola 4:11) Lelo kwati fye bantu abengi mu fifulo fimbi, abantu ba mu fyalo fyabela pa Kati ka Afrika ilingi line balisuula ishina lyakwe ilya kuti—Yehova.

Abantu ba mu fyalo fyabela pa Kati ka Afrika, na ba mu fifulo fimbi ifya calo, balalanda pe shina lya kwa Lesa ilyo balepepa Ipepo lya we Shifwe ukuti, “ishina lyenu libelwe akatiina.” (Mateo 6:9) Pa nshita ntali, banono abaishibe ili shina. Lelo, pa myaka iingi, umulimo wa kushimikila uwa Nte sha kwa Yehova ishapimpa walenga abantu ukutendeka ukulumbula ishina lya kwa Lesa. Na lelo, ishina lya kwa Lesa lyalishibikwa sana no kupokelelwa mu ndimi ishingi isha cina Afrika, pamo nge ciZulu umo batila (uJehova), iciYoruba (Jehofah), iciXhosa (uYehova), ne ciSwahili (Yehova). Nalyo line, amabupilibulo ayengi aya Baibolo muli ishi ndimi tayabamo ishina lya kwa Lesa.

Baibolo iisuma iyakwata ishina lya kwa Lesa ni Baibolo ya mu ciZande, ululimi ulo balanda mu ncende shabela mu Central African Republic, ku Sudan, na Democratic Republic of Congo. Kuli iyi ncende, abantu balalanda ishina lya kwa Lesa, ukulishimbula mu lulimi lwabo ati Yekova. Te mulandu ne fyo ishina lya kwa Lesa lishimbulwa mu lulimi lwa cikaya, calicindama ukulilumbula. Mulandu nshi? Pantu “umuntu onse uwalilila kwi shina lya kwa Shikulu [Yehova, NW] akapusuka.”—Abena Roma 10:13.

[Mapu ne Cikope pe bula 32]

(Nga mulefwaya ukumona mapu, moneni muli magazini)

SUDAN

CENTRAL AFRICAN REPUBLIC

DEMOCRATIC REPUBLIC OF CONGO

[Abatusuminishe]

The Complete Encyclopedia of Illustration/J. G. Heck