Abaleonaula Imiti

PA NSHITA ifyalembwa mu Baibolo fyalecitika, imiti yalemonwa nge fipe fya mutengo. Ku ca kumwenako, ilyo Abrahamu ashitiile Sara umukashi wakwe uwatemwikwa impanga ya kushikwamo, imiti yalisanshiwemo mu cipangano ca ku kushita icikwatwa.—Ukutendeka 23:15-18.

Na lelo line, imiti yalicindama sana, kabili ifyalo ifingi nafyangwako ukutengela imiti. Icitabo ca State of the World 1998 citila: “Nangu ca kuti abantu abengi abekala mu fyalo fyabela ku kapinda ka ku kuso bamona kwati imitengo ya mu fyalo fyakaba ileonaulwa, napamo tabaishiba fye ukuti imitengo yaba mu fyalo fyabo ifyatalala yashala fye mumo mumo kabili e yaonaulwa sana pa mitengo yonse iyabako.” Cinshi cilelenga imitengo ya mu fyalo fya ku kapinda ka ku kuso aka Bulaya na North America ukonaulwa? Abengi batila mulandu wa kubungaule miti, lelo kwaliba na fimbi ifyonaule miti, e kutila fyena fyonaula fye umo umo. Finshi fyo? Mwela wakowela ne mfula ya asidi. Ifi fintu kuti panono panono fyasuka fyanasha imiti, ukuiilenga ukusansalikwa ku tushishi na malwele.

Pa myaka iingi, abasoma pa mpanga na bantu fye bambi abayangwako balilandapo pa kukabila kwa kucingilila impanga. Muli ba 1980, ilyo basayantisiti mu Germany basomene ifyo umwela wakowela ne mfula ya asidi ficita ku mpanga, basondwelele ati: ‘Nga ca kuti tapali icicitilwe, napamo mu mwaka wa 2000, abantu bakalakumbwa fye imitengo yakopwa pa fikope fya kale na mu mafilimu.’ Iciwemeko ca kuti amaka ye sonde aya kuibukulula yaliluma nga nshi ica kuti ukufika na lelo imitengo tayaonaulwa ukulingana ne fyo basobele.

Nalyo line, ku nshita ya ku ntanshi ni Lesa e ukatengela impanga yesu. “E unwenshe mpili ayafuma mu miputule yakwe ya pa muulu” kabili “e umesho mulemfwe ku fitekwa, ne fimena fiteku ku fibomfi fya bantunse.” Kabili alayo “konaula abaleonaule calo.” (Amalumbo 104:13, 14; Ukusokolola 11:18) Fintu cikawama ilyo abekashi ba pe sonde bakaipakisha icalo casanguluka umuyayaya!—Amalumbo 37:9-11.