Bushe Cinshi Cikabilwa pa Kuba na Kampingu Wasanguluka?

“UBUTEKO Bwaebwa Ukupoka Indalama sha ku Brazil R$20,000.” Uyu mutwe waibela uwe lyashi wali mu nyunshipepala ya nomba line iya ku Brazil iya Correio do Povo. Ici cipande cashimike ilyashi lya kwa Luiz Alvo de Araújo, uubomba incito ya kutwala amakalata muli ilya ncende, uwashitishe impanga yakwe ku buteko. Pa numa ya kusaina ifipepala fya kulanga ukuti iyi mpanga nomba ya buteko, Luiz alipapile ukusanga ukuti indalama bamulipile shalipulilemo R$20,000 (mupepi na madola ya ku America $8,000) pa mutengo baumfwanene!

Tacali icayanguka ukubwesha shilya ndalama shapulilemo. Pa numa ya kusempela ku maofeshi ya buteko ukwabula icili conse ukucitwa, Luiz aebelwe ukufwaya loya no kuti uyu mulandu ukakalululwe mu cilye. Kapingula uwaebele ubuteko ukupoka indalama no kulipila isho balingile ukulipila atile: “Cilemoneka ukuti umuntu umo alilufyanya, kabili pa mulandu wa kupikana kwa uyu mulandu tapali uwaishibe ifya kukalulula. Nshabala umfwapo umulandu wabe fi.”

Luiz, uuli ni Nte ya kwa Yehova alondolola ukuti: “Kampingu wandi uwakanshiwa na Baibolo tansuminishe ukusunga icintu icishili candi. Nalekabila ukubwesha shilya ndalama.”

Abengi te kuti bomfwikishe imibele ya musango yu. Lelo Icebo ca kwa Lesa cilanga ukuti Abena Kristu ba cine balicindamika nga nshi kampingu wasanguluka mu fyo babomba na balashi ba buteko. (Abena Roma 13:5) Inte sha kwa Yehova bapampamina pa kuba na ‘kampingu musuma, no kwenda bwino bwino muli fyonse.’—AbaHebere 13:18.