Kuti Mwapusuka Shani Impela ya Cino Calo?

BAIBOLO ilondolola impela ya buno bwikashi ukuti “bushiku bwa kububuka, bushiku bwa kumanama kabili ubwa mpatapata, bushiku bwa kusampanya kabili ubwa cimfulumfulu, bushiku bwa mfifi kabili ubwa mfifi iyatoola, bushiku bwa makumbi kabili ubwa makumbi ayafiitula.” (Sefania 1:15) Kwena, te bushiku mwingafwaisha bwafika! Lelo, umutumwa Petro akonkomeshe Abena Kristu banankwe ‘ukulolela no kufulukisho kwisa kwa Bushiku bwa kwa Lesa, pa mulandu wa ubo imyulu ikapya ikenguluka, ne fya mu muulu fikasungululwa ku cikabilila. Lelo imyulu ipya ne calo cipya e fyo tulolela, umwaikalo bulungami, umwabele cilayo cakwe.’—2 Petro 3:12, 13.

Petro talelanda pa konaulwa kwa myulu ne sonde. “Imyulu” ne “calo” ifyo Petro alelandapo mitekele yabipa iya bantunse na bantunse bene abashipepa. “Ubushiku bwa kwa Yehova” tabwakonaule isonde, lelo ‘bukafita ababembu ba ciko ukubafumyamo.’ (Esaya 13:9) Ku “bateta no kulila pa fya muselu fyonse ifilecitwa” muli buno bwikashi bwa bantu babipa, ubushiku bwa kwa Yehova bukaba bushiku bwe pusukilo.—Esekiele 9:4.

Lelo, bushe umo kuti apusuka shani mu “bushiku bwa kwa Yehova, ubukulu kabili ubwa kutiinya”? “Icebo ca kwa Yehova” icasokolwelwe kuli kasesema wakwe cayasuka ati: “E lyo, onse uukalilila kwi shina lya kwa Yehova akapokololwa.” (Yoele 1:1; 2:31, 32) Inte sha kwa Yehova kuti batemwa ukumwafwa ukusambilila umwalola ukulilila kwi shina lya kwa Yehova.