Ukwibukisha Inte sha kwa Yehova Abaipaiwe

PA March 7, 2002, kwali ukufimbula pa cipampa calembwapo mwi tauni lya Körmend ku masamba ya Hungary. Ici cipampa cali ca kwibukishishapo Inte sha kwa Yehova batatu abo baipeye ku baNazi mu 1945.

Ici cipampa bacipopela pa cibumba ca maofeshi yakalamba aya bashimya umulimo ayaba mu Musebo wa Hunyadi umo babepaile pa cintubwingi. Ici cipampa bacipangile pa kuti baleibukishishako ‘Abena Kristu baipaiwe mu March 1945 pa kukaana ukucita ifyo kampingu wabo abakeenye. Antal Hőnisch (1911-1945), Bertalan Szabó (1921-1945), János Zsondor (1923-1945), 2002, Inte sha kwa Yehova.’

Aba bantu baipaiwe imyeshi fye ibili ilyo Inkondo ya Calo Iya Bubili ishilapwa. Cinshi aba Bena Kristu babepaile? Inyunshipepala ya ku Hungary iya Vas Népe yalondolwele ati: “Ilyo Hitler atampile ukuteeka mu Germany, abaYuda pamo ne Nte sha kwa Yehova e bo alepakasa no kulungulusha, balepooswa mu nkambi sha kucushiwilwamo no kwipaiwa nga ca kuti batwalilila ukuba no busumino bwabo. . . . Mu March 1945, kwali ulukaakala lwakulisha ku masamba ya Hungary. . . . Cimo ico bacitile muli ulu lukaakala, kutamfya Inte sha kwa Yehova mu calo no kubepaya.”

Ukufimbula pa cipampa uko bacitile pa kwibukisha abaipaiwe kwali pa ncende shibili. Ukwa ntanshi kwacitilwe mu ciyanda ca fyangalo icitwa Batthyány Castle. Pali bakalanda, pali Profesa Szabolcs Szita, umukalamba wa kabungwe ka Holocaust Documentation Center mu Budapest; Lászlo Donáth, uwa mu cilye ca Parliament’s Committee for Human Rights, Minority and Religious Affairs; na Kálmán Komjáthy, uwaliko ilyo balebepaya, uwaba nomba ni ncenshi mu milandu ya kale muli ili tauni. Abantu ukucila pali 500 abasangilweko bapitile mu tauni pa kuya ku ncende ya bubili ukwabelele ulya programu—uko József Honfi, Umukalamba we tauni lya Körmend afimbwile pa cipampa.

Muli kalata wakwe uwa kulaya, Ján Žondor, (János Zsondor) akoseleshe bamunyina na bankashi yakwe aba Bwina Kristu ukukanaba no bulanda. Alembele ati: “Ncili ndebukisha amashiwi ya kwa Yohane ayabapa Ukusokolola 2:10, ayatila: ‘Ube uwa cishinka ukufika ku mfwa.’ . . . Mwebe abali ku ng’anda ukukanaba no bulanda, pantu nafwila pa cine, te buntalamisoka nafwila.”

[Icikope pe bula 32]

Bertalan Szabó

[Icikope pe bula 32]

Antal Hőnisch

[Icikope pe bula 32]

Ján Žondor