“Nshaishibe Fingi Pali Lesa”

UMWAUME umo uwikala mu Kerala, ku India alembele ati: “Uyu mwaka wapwile, Inte sha kwa Yehova balentandalila no kunjebako ilyashi lishaiwamina pa lwa Bufumu bwa kwa Lesa. Nali Katolika pa myaka 8, lelo nshaishibe fingi pali Lesa. Muli uyu wine fye umwaka umo, ninsambilile fingi. Nintemwa pa kwishiba ukuti Ulupungu lwa kwa Kalinda lusabankanishiwa mu ndimi 139 [pali nomba 146].” Kabili atila, “Icipapusha ca kuti abantu ba ndimi shonse baleishiba ubukombe bulanda pali Lesa.”

Nangu line aba mano ya buntunse abengi batila abantu tabengeshiba Lesa, umutumwa Paulo alilondolwele bwino ukuti kuti bamwishiba. Ilyo alelanda ku mabumba ya bena Atena, apali na bamo abalepepela pa cipailo capangilwe “Lesa Uushaishibikwa,” Paulo atile: “E ico uo mupepa untu mushaishiba e o ndesabankanya kuli imwe. Lesa uwalengele pano calo na fyonse ifyabapo . . . e upeela abantu bonse ubumi no mupu na fyonse. Kabili ku muntu umo alengele inko shonse sha bantunse, ukwikala pano isonde ponse.”—Imilimo 17:23-26.

Paulo akonkomeshe abalekutika kuli wene ukuti bafwile ukufwaya ukwishiba Kabumba, pantu “taba kutali kuli ifwe umo umo.” (Imilimo 17:27) Inte sha kwa Yehova bakatemwa ukumwafwa ukwishiba Lesa wa cine ne mibele yakwe iisuma.