Ifipusho Ukufuma ku Babelenga

Bushe kuti kwaba amateyanyo yamo nga ca kuti Umwina Kristu wasubwa uwanakuka afilwa ukusangwa ku cibukisho ca Mulalilo wa kwa Shikulu?

Ee. Fimo kuti fyacitwa kabili filingile ukucitwa pa kulangulukilako Umwina Kristu wasubwa uwanakuka uyo nalimo uushifuma pa busanshi kabili uwingafilwa ukusangwako ilyo icilonganino cilesefya Icibukisho ca mfwa ya kwa Kristu. Nga cabe fyo, ibumba lya baeluda kuti lyasala eluda nelyo Umwina Kristu umwaume uwakosoka ukutwala umukate wa cimpashanya no mwangashi kuli uyu wasumina munankwe bulya bwine bushiku ilyo akasuba kashilatula.

Ukulingana ne fyo ifintu fili, eluda umutandashi nelyo munyina kuti alandapo mu kwipifya no kubelengako amalembo ayalingile. Kuti acita filya Yesu acitile ilyo Atendeke Umulalilo wa kwa Shikulu. Ku ca kumwenako, nalimo kuti abelenga Mateo 26:26 no kumupeela umukate ushatutumuka pa numa ye pepo. Lyena, uyu munyina umutandashi nalimo kuti abelenga Mateo icipandwa 26, ifikomo 27 na 28, no kumupeela umwangashi pa numa ye pepo na limbi. Kuti kwaba ukulandako amashiwi ya kulanga ubucindami bwa cimpashanya cimo na cimo, kabili kuti cawama ukupepa ipepo lya kusondwelela.

Kwena, umo afwile ukwesha sana ukuti asangwe ku kusefya Umulalilo wa kwa Shikulu pa cilonganino. Lelo cinshi cingacitwa nga Umwina Kristu wasubwa mulwele sana, ali mu cipatala, nelyo nalimo cayafya ukusefya Icibukisho pa numa ya kuwa kwa kasuba pa Nisani 14? Uyo wasubwa kuti acita filya calecitwa ukulingana ne Funde lya kwa Mose no kusefya icibukisho eka pa numa ya nshiku 30.—Impendwa 9:9-14.