“Tulefwaya Tukaasuke Atuti, ‘Ee!’”

TAPALAKOKOLA apo amaofesi ya Nte sha kwa Yehova mu Nigeria yapokelele kalata uwalimo amashiwi ayasosele ifyakonkapo ifinono:

“Anderson umwana wesu, afwile ilyo ali ne myaka 14. Ilyo talafwa, atekele inkoko shibili. Alefwaya ukushitisha bamukolwe e lyo pa numa ukutuma indalama ashitishemo bamukolwe ku ofesi, umusangulo wa mulimo wa kushimikila uwa mwi sonde lyonse. Nomba afwile ilyo inkoko tashilashitishiwa.

“Pa mulandu wa kuti umwine afwaile ukutuma indalama ku ofesi, ifwe, fwe bafyashi bakwe, twalekele inkoko shakula kabili no kushitisha twashitisha. Twatuma indalama ya kwa Anderson umusangulo kuli imwe. Pa mulandu wa cilayo Yehova alaya, tulesubila ukutila nomba line fye, twalaswa atumona Anderson kabili. Tulefwaya tukaasuke atuti, ‘Ee!’ ilyo akatwipusha nga twalicitile ico umutima wakwe walefwaisha ukucita. Naendi, tulesubila ukumona te Anderson eka lelo ne ‘kumbi lya nte ilyakule fi’ abakabuuka.”—AbaHebere 12:1; Yohane 5:28, 29.

Nga filya uyu kalata alondolwele bwino bwino, ukusumina mu kubuuka e subilo likasha Abena Kristu ba cishinka. Indupwa ishingi shikatemwa nga filya abafyashi ba kwa Anderson bakatemwa ilyo bakasengela abafwa abafwile ku mfwa iilwani!—1 Abena Korinti 15:24-26.

Icebo ca kwa Lesa cilalanda pe subilo lisansamusha ilya kubuuka ukutila lyaba pa fipapwa fikalamba ifikacitika nomba line mu calo cipya icalungama ilyo Ubufumu bwa kwa Lesa bwakulateeka. (2 Petro 3:13) Ukulanda pa co ukufwaya kwa kwa Lesa kukacitila bantu mu nshita ilya, Baibolo itila: “Akafuuta ifilamba fyonse ku menso yabo, ne mfwa tayakabeko kabili iyo, nangu kuloosha nangu kukuuta nangu kukalipwa tafyakabeko kabili iyo. Ifya ntanshi nafiya.”—Ukusokolola 21:3, 4.