“Cinshi Cabe Nkama Yenu?”

UBU bwipusho ubwaipwishe umukoloci umbi umbi fye bwalipapwishe baMuriel, banyina ba bana batatu ilyo bali pe tuuka apo bashitishisha ifya kulya fyayanguka. BaMuriel bali abapamfiwa ukumonana na badokota abapusanapusana pa mulandu wa bana babo kabili balicelelwe. Tabakwete nshita ya kuya ku ng’anda ku kulya umulalilo ilyo tabalaya ku kulongana kwabo ukwa Bwina Kristu. E co baMuriel basendele abana babo kwi tuuka lya fya kulya ilyali mupepi pa kuti bwangu bwangu balyeko fimo ilyo tabalaya ku kulongana.

Ilyo balelya ica kulya, umwaume umo apaleme kuli baMuriel no kutila: “Naciba ndemulolesha ukutula apo mwishile muno. Nimono kuti abana benu nabapusanako na bana bambi abo mona. Te kuti mutemwe ukumona ifyo abana bambi bacita ku matebulo ne mipando. Balabika amolu pa tebulo kabili balasunka imipando ica kuti kuti wafilwa no mwa kulosha. Abana benu bena bali fye tondolo kabili nabaicindika. Cinshi cabe nkama yenu?”

BaMuriel bayaswike ati: “Ine na bamulume bandi tulasambilila Baibolo pamo na bana besu, kabili tuleesha ukucita ifyo tusambilila mu mikalile yesu. Tuli Nte sha kwa Yehova.” Pa numa ya kumfwe fi, umwaume atile: “Ndi muYuda kabili napuswike mu kwipayaulula ukwaliko. Ndeibukisha ukumona uko baNte balebacusha mu Germany. Te mulandu no kubacusha, balishibikwe nge Nte sha kwa Yehova abapusana kuli bambi. Natemwa sana ukumona imibele ya bana benu. Mfwile ukufwailisha ifingi pa mipepele yenu.”

Baibolo libuuku ilisuma sana ilingamwafwa ilyo mulekusha abana benu. Inte sha kwa Yehova balitemwa ukwafwa bambi ukunonkelamo mu butungulushi busangwa mu Malembo. Tulemukoselesha ukwankula ku bwite buli pe samba.