Baibolo wa ku Berleburg

MULI ba1600 na ba1700 mu Germany mwaimine imipepele iyailetwa ukuti Pietism e kutila Abaipeelesha ku fya Mapepo. Na kuba iyi mipepele yafumine mwi Calici lya Lutheran. Abali muli yi mipepele abengi balesekwa no kupakaswa pa mulandu wa cisumino cabo. Abasoma abengi abaali muli iyi mipepele bafulumukiile ku Berleburg, bakilomita 150 ukulola ku kapinda ka ku kuso aka Frankfurt am Main. Balipokelelwe ku mukankaala wa kulya kuntu, Count Casimir von Wittgenstein Berleburg, uwacindike sana ifya mapepo. Ukwisa kwa aba bashimapepo abasambilila sana kwalengele ukuti batendeke ukupilibula Baibolo, uwaishibikwa pali lelo ukuti Baibolo wa ku Berleburg. Cali shani pa kuti bapilibule uyu Baibolo?

Umo pa bafulumukiile ku Berleburg ni Johann Haug, uwapatikishiwe ukusha umusumba aleikalamo mu Strasbourg pa mulandu no mucusha wa bashimapepo kulya. Haug alisambilile sana kabili alikwete ne ca bupe ca kwishiba indimi ishingi. Aebele abasoma banankwe mu Berleburg ukuti ico wene alefwaisha “kupilibula Baibolo bwino bwino, ukulungika ifilubo fyali muli Baibolo wa kwa Luther, no kupilibula ukulingana fye no mo Icebo ca kwa Lesa cabela no bufwayo bwa ciko.” (Die Geschichte der Berlenburger Bibel [Ukwafumine Baibolo wa ku Berleburg]). Ubufwayo bwakwe bwali bwa kupilibula Baibolo no kubikamo ifyebo ifilelondolola ifiputulwa ifyayafya, pa kuti ileumfwika ku bantu yaweyawe. Haug alombele abasoma bambi mu fyalo fimbi ifya ku Bulaya ukumwafwako, kabili abombele uyu mulimo pa myaka 20. Baibolo wa ku Berleburg asabankanishiwe pa kubalilapo fye mu 1726. Pa mulandu wa fyebo ubwingi ifya kulondolola amashiwi yakosa, yakwete amavolyumu 8.

Ukwabulo kutwishika muli Baibolo wa ku Berleburg mwaliba ifyawamamo. Ku ca kumwenako, pa Ukufuma 6:2, 3 patila: “Kabili Lesa asosele kuli Mose no kutila kuli wene: Nine SHIKULU! Kabili namoneke kuli Abrahamu na kuli Isaki na kuli Yakobo nga Lesa wa maka yonse: lelo nshailengele ukwishibwa kuli bene ukubomfya ishina lyandi YEHOVA.” Paliba na mashiwi ya kulondolola icikomo ayatila: “Ishina lya kuti YEHOVA . . . , e shina lya kumupaatulako atemwa ilyo umwine aipeela.” Ishina lya kwa Lesa ilya kuti Yehova, lilasangwa na mu bulondoloshi bwaba pa Ukufuma 3:15 na pa Ukufuma 34:6.

Kanshi Baibolo wa ku Berleburg asanshiwe ku maBaibolo ayengi ayakonkelepo mu ciGerman ayabomfya ishina lya kuti Yehova mu fikomo, mu tulembo twa mwi samba, nangu mu mashiwi ya kulondolola ifikomo. Ubupilibulo bumo ubwa pali ndakai ubwacindika sana ishina lya kwa Lesa bupilibulo bwa New World Translation of the Holy Scriptures, iyasabankanishiwa ne Nte sha kwa Yehova.