Amepusho Ukufuma ku Babelenga

Bushe Davidi, umuntu wa pa mutima uwa kwa Lesa, asungile bankole buluku buluku, nge fyo bamo bomfwa amashiwi yaba pali 2 Samwele 12:31 na 1 Imilandu 20:3?

Awe nakalya. Davidi apeele fye bankole abena Amone umulimo wa kupatikishiwa. Bamo balisendapo icushi pa fyo Davidi acitile, pa mulandu wa fyo amaBaibolo yamo yapilibula ifi fikomo.

Pa kulondolola ifyo Davidi akandile abana ba kwa Amone, ayo maBaibolo yamutunga ukuba umunkalwe nelyo uwakaluka. Ku ca kumwenako Baibolo wa Cibemba uwa mu 1956 pali 2 Samwele 12:31, itila: “Na bantu abalimo alibafumishe, no kubabika kuli basoo na kuli bapiki ba cela na ku masembe ya cela, no kubabomfya ku fikombola fya njelwa: e fyo acitile ku mishi yonse ya bana ba kwa Amone.” E fyapilibulwa ne 1 Imilandu 20:3.

Lelo uwasoma ifya Baibolo Samuel Rolles Driver, alandilepo ukuti ubunkalwe “tafyufwana ne fyo twaishiba ukuti e fyo Davidi aali.” Ukulandapo kwa Baibolo ya The Anchor Bible kutila: “Davidi alepekanya amabumba ya basha aba kubomba imilimo pa kuti ifyalo fyacimfiwe fibomfiwe ku kuleta ubunonshi. Cilemoneka ifyo cali icaseeka ku shamfumu ishalecimfya ukucite fyo.” Ifyo fine e fyo na Adam Clarke alandile ilyo atile: “Kanshi cilolele mu kuti Davidi asendele abantu ubusha no kubapeela umulimo wa kulepula imbao, ukupanga ifya kuliminako ifya cela, nelyo ukubabomfya mu kwimba ulubwe . . . no kutema imiti, kabili no kutama injelwa. Ukuputula abantu pa kati na basoo, ukubakakaula, ukubakomaula, kabili no kubaputaula, te filandwapo muli ili lembo, kwati fye fintu cishali kuli Davidi ukucite fyo ku bana ba kwa Amone.”

AmaBaibolo ayalekanalekana aya muno nshiku ayabamo ubulondoloshi busuma ngo bu yena yalatubulula bwino ukuti Davidi te kuti apeelwe umulandu wa bunkalwe.a Moneni ifyo The Bible in Bemba (1983) ilanda. Itila: ‘Asenda na bantu abaali mu musumba, ayabapeela imilimo ya kubomba na basoo, na bapiki, na masembe, ne njelwa. E fyo acita na ku bantu bonse abaali mu misumba yonse iya bena Amoni.’ (2 Samwele 12:31) Pali 1 Imilandu 20:3 pena itila: ‘Asenda na bantu abaali mu musumba, ayabapeela imilimo iya kubomba na basoo, ne nkasu, na masembe. E fyo acita na ku bantu bonse abaali mu misumba yonse iya bena Amoni.’ Baibolo wa New World Translation na o alasuminishanya na basoma Baibolo abaumfwikisha bwino aya malembo. Pali 2 Samwele 12:31 itila: “Na bantu abalimo alibafumishe ukuti ababike ukuba aba kuputula amabwe no kupanga ifyela fyatwa na masembe ya cela, kabili abacitile ukubombela ku fikombola fya njelwa.” Pali 1 Imilandu 20:3 itila: “Abantu abali muli wene alibafumishe ku nse, kabili abapeele umulimo wa kuputula amabwe no kubombela ku fibombelo fyatwa ifya cela na masembe; kabili e fyo Davidi acitile ku misumba yonse iya bana ba kwa Amone.”

Davidi talungulwishe abana ba kwa Amone abacimfiwe no kubepaya buluku buluku. Takonkele ifibelesho fyabipa balecita mu bulwi mu nshiku shakwe.

[Futunoti]