Imibele Isuma ‘Ilapuulamika Isambilisho lya kwa Lesa’
MARIA, umwaice uwikala mu musumba wa Kransnoyarsk mu calo ca Russia, alishiba ukwimba inyimbo icine cine ica kuti na kafundisha wakwe, amusalile ukuba mwi bumba lya bakemba ba pa sukulu. Ilyo bamusalile, Maria aile kuli kafundisha umo no kumulondolwela mu mucinshi ukutila te kuti embeko inyimbo shimo. Nga cinshi? Pantu ukwimba inyimbo shakwete amashiwi ya mapepo kwalepusana ne fyo asuminamo ifyaba mu Baibolo. Kafundisha alipapile, kabili atile, ‘Nga cinshi cingabipa nga ulelumbanya Lesa mu lwimbo?’
Pa kulondolola ico akanine ukwimba ulwimbo lwalelanda pali Bulesa Butatu, Maria akupukwile Baibolo yakwe no kulondolola ukuti Lesa na Yesu Kristu tababa Lesa umo, no kuti umupashi wa mushilo na o maka yabomba aya kwa Lesa. (Mateo 26:39; Yohane 14:28; Imilimo 4:31) Maria alondolola ukuti: “Bucibusa bwandi na kafundisha tabwapwile. Icawamisha ca kuti, pa sukulu pa mwesu, twalikwata bakafundisha abengi abasuma nga nshi. Bafwaya twaba abafumacumi.”
Umwaka fye onse uwa kusambilila, Maria alipeelwe umucinshi kuli bakafundisha e lyo na bo alesambilila na bo. Maria atila: “Ifishinte fya mu Baibolo filangafwa mu bumi bwandi. Pa mpela ya mwaka ilyo twaisele isukulu, bampeele icilambu ca kuba umufumacumi kabili uwa mibele isuma, e lyo na bafyashi bandi na bo babalembeele kalata wa kubatasha pa fyo bankusha bwino.”
Maria abatishiwe pa August 18, mu 2001. Kabili atila: “Nintemwa ukuti ndebombela Lesa umusuma, Yehova!” Inte sha kwa Yehova abaice mwi sonde lyonse balakonka ifyaba pali Tito 2:10, apo tubelenga ukuti: “Bapuulamike isambilisho lya kwa Lesa, Umupusushi wesu, muli fyonse.”
[Icikope pe bula 32]
Kalata wa kutasha na setifiketi bapeele Maria uwa kutasha imibele yakwe
[Icikope pe bula 32]
Maria na bafyashi bakwe ilyo abatishiwe