Ukubile Mbila Nsuma ku Bena Makedonia
“ABUKILENI ku Makedonia no kutwafwa.” (Imilimo 16:9) Uwasosele aya mashiwi, mwaume wamoneke mu cimonwa ku mutumwa Paulo kabili yasokolwele ukuti imbila nsuma iya Bufumu bwa kwa Lesa yalekabila ukubilwa mu Makedonia, e kutila mu misumba iyaba nomba mu Grisi. Nga pali lelo, bushe imbila nsuma icili ilekabila ukubilwa kulya?
Pali lelo, Nte umo mu Makedonia alingile ukushimikila ku bantu 1,840. Abantu abengi tabaumfwanapo pali Yehova Lesa. Cine cine, abantu ba muli ici calo balekabila nga nshi ukukutika ku bukombe bwa mutende.—Mateo 24:14.
Lesa alisula kale inshila ya kwafwilamo balya bantu. Bushiku bumo mu November 2003, aba pe ofesi lya Nte sha kwa Yehova ilya mu Makedonia, ilyaba mu Skopje, bapokelele lamya uo bashale-enekela. Uyu lamya afumine kwi ofesi lya baCenter for International Cooperation, bale-eba Inte sha kwa Yehova ukuyakuula itebulo ku bulangisho bwa nshiku shitatu pa kuti bakalondolole fyo basuminamo. Ala mwandini lilya lyali lishuko lishaikulila ilya kulanda na bantu abengi nga nshi abashatalile abakutikako ku mbila nsuma iya Bufumu!
BaNte balibombeshe sana ukupekanya apa kuyatantika impapulo shalekanalekana isha Nte sha kwa Yehova isha mu lulimi lwa bena Makedonia. Balitantike ishi mpapulo pa kuti abaletandala bengasendapo isho batemwa. Uku kutantika kwalengele abantu abengi ukuba ne shuko lya kupokelela amenshi ya ku mupashi aya bupe fye.—Ukusokolola 22:17.
Abaletandalapo abengi balefwaya impapulo shalebakuma sana, pamo nga Ifipusho Abacaice Bepusha—Ifyasuko Fibomba na Icaba Inkaama ku Nsansa sha Lupwa.a Abantu 98 balishile akeyala kabo kabili balefwaya Inte sha kwa Yehova ukulabatandalila. Abengi balitashishe pa mulimo usuma uwa Nte sha kwa Yehova na pa mpapulo shabo ishalembwa bwino.
Wishi umo aishile kwi tebulo ninshi naikata no mwana wakwe umwaume pa kuboko. Lyena aipwishe nga pali impapulo isha kusambilishamo abana. BaNte bamulangile Icitabo Candi ca Malyashi ya mu Baibolo.b Atendeke ukutamba muli ici citabo ica kuti alitemenwe sana kabili aipwishe umutengo. Ilyo bamwebele ukuti umulimo wa kusambilisha uwa Nte sha kwa Yehova utungililwa ne misangulo ya kuitemenwa, alisansamwike icine cine. (Mateo 10:8) Alangile umwana wakwe icitabo no kutila: “Mwandi ici citabo cisuma nga nshi! Nkalakubelengela ilyashi limo cila bushiku!”
Uwasambilila sana amano ya buntunse na o alishile kwi tebulo. Alefwaya ukwishiba ifingi pa mipepele yonse lelo sana sana pa fyo Inte sha kwa Yehova shasuminamo. Ilyo aloleshe mu citabo ca Ukusapika Lesa Ukwa Mutundu wa Muntu,c uyu mwaume atile: “Ifi fyebo fyalilembwa bwino sana! Ifi fine e fyo na ine naletontonkanya ukuti e fyo ifintu fifwile ukuba.” Pa numa, abo asambilisha baishile kwi tebulo no kupokako icitabo casendele ulya kafundisha. Balefwaya ukulabelenga muli ici citabo. Baletontonkanya ukuti akulabasambilisha ifyebo alebelenga muli cilya citabo.
Kulya kutantika kwalengele abantu abengi ukumfwa no kuibelengela icine ca mu Malembo pa muku wa kubalilapo. Ibumba lya bankomamatwi abapungwe na lyo lyalishile ku kumona nga pali ifyo bengatemwa. Nte umo alandile ilyashi ilipi kuli bena, kabili umukashana umo e walepilibwila mu lulimi lwa bankomamatwi. Ukubomfya ifikope fyaba mu citabo ca Umuntu Wakulisha Uwabalile Abako Uwa Mweo,d alondolwele ukuti Yesu aliposeshe abalwele abengi ukusanshako fye na bankomamatwi. Balitemenwe nga nshi pa kwishiba ubulayo bwa mu Baibolo ubwa kuti nomba line Yesu akacita cimo cine ku bantu pano calo. Abengi balipokeleko impapulo shilanda pali Baibolo, kabili baliteyenye ukuti Nte uwaishiba ululimi lwa bankomamatwi akabatandalile.
Ishi mpapulo tashali fye mu lulimi lwa bena Makedonia, balikwete na mu lulimi lwa bena Albania, mu ciNgeleshi, no lwa bena Turkey. Umwaume umo ushaishiba ululimi lwa bena Makedonia aipwishe ukuti bamupeeleko impapulo sha mu ciNgeleshi. Pa numa ya kumupeela bamagazini ba mu ciNgeleshi aba Ulupungu lwa kwa Kalinda na Loleni!, aishilesosa ukuti alanda ululimi lwa bena Turkey. Ilyo bamulangile impapulo mu lulimi lwakwe, alipapile sana! Ailwike ukuti Inte sha kwa Yehova bafwaya ukwafwa abantu bonse fye.
Mwandini ubunte busuma bwalicitilwe pali ilya nshita, kabili twalikoseleshiwe ukumona uko abantu abengi batemenwe ukumfwa icine ca mu Baibolo! Ca cine ukuti Yehova aliswile inshila ya kuti abantu abengi bomfwe imbila nsuma ya Bufumu mu Makedonia.
[Amafutunoti]
a Fyonse fyasabankanishiwa ne Nte sha kwa Yehova.
b Fyonse fyasabankanishiwa ne Nte sha kwa Yehova.
c Fyonse fyasabankanishiwa ne Nte sha kwa Yehova.
d Fyonse fyasabankanishiwa ne Nte sha kwa Yehova.
[Akabokoshi ne Fikope pe bula 9]
UKULUNDULUKA KUKALAMBA!
Pa May 17, 2003, kwacitike icintu cimo icalengele ukuti kube ukubombesha nga nshi mu kubila imbila nsuma ya Bufumu bwa kwa Lesa mu Makedonia. Iofesi lya Nte sha kwa Yehova lyalipeelwe mu Skopje. Imyaka ibili yalipwile pa kuti bapwishe ubukuule bwa kukusha iofesi ilikulile imiku ine ukucila ifyo lyali kale.
Paba ifikuulwa fitatu ifibomfiwa nga maofesi ya butungulushi, aya kupilibwilamo impapulo, umwa kusendama, umwa kwipikila, no mwa kucapila ifya kufwala. Munyinefwe Guy Pierce, uwa mwi Bumba Litungulula ilya Nte sha kwa Yehova e walandile ilyashi lya kupeela iofesi. Abatandashi ukufuma mu fyalo 10 e basangilwe kuli programu wa kupeela iofesi. Bonse balitemenwe nga nshi ilyo bamwene ifikuulwa fipya ifyayembe cine cine.
[Mapu pe bula 8, 9]
(Nga mulefwaya ukumona mapu, moneni muli magazini)
BULGARIA
MAKEDONIA
Skopje
ALBANIA
GRISI
[Icikope pe bula 8]
Skopje, Makedonia