“Tabasuuswike Iyo”

YESU KRISTU aebele abasambi bakwe ukuti: “Muli aba nsansa ilyo abantu bamupontela no kumupakasa no kumubepesha umusango onse wa bubifi pa mulandu wandi.” (Mateo 5:11) Inte sha kwa Yehova ba nsansa pantu, ukulingana no kufunda kwa kwa Kristu ne ca kumwenako cakwe, “tabali ba pano calo” kabili tabaibimba nelyo panono mu milandu ya calo lelo baba na bucishinka kuli Lesa mu fintu fye fyonse.—Yohane 17:14; Mateo 4:8-10.

Ukulosha ku kukanasuusuka ukwa Nte sha kwa Yehova isha mu calo cali kale Soviet Union, ne sha mu Estonia, uwasoma ifya mipepele kabili kapilibula wa Baibolo umuLutele, Toomas Paul alemba mwi buuku lya Kirik keset küla (Icalici pa Kati ka Mushi) ukuti: “Banono sana baishiba icacitike ulucelo pa April 1, 1951. Kwali kampeni iya kutamfya Inte sha kwa Yehova na bonse abasangwa ku mapepo yabo, kabili bonse abo baikete no kutamfisha ku Siberia bali pamo 279. Babebele ukusaina icipepala ca kulekuluka mu citetekelo cabo pa kuti bebatamfya nelyo ukubakaka mu cifungo. . . . Ukusanshako abo baikete kale, bonse abali mu cifungo bali pamo 353, ukulundako na bantu 171 abaikatilwe pa kwampana fye ne filonganino fyabo. Nangu ni ku Siberia kwine tabasuuswike iyo. . . . Te bengi abe Calici lya ciLutele mu Estonia abakwete icitetekelo nga cilya Inte sha kwa Yehova bakwete.”

Inte sha kwa Yehova mu calo conse bacetekela muli Lesa ukubafwa ukutwalilila aba cishinka kabili aba cumfwila te mulandu no kucushiwa. Balasekelela pa kwishibo kuti icilambu ca bucishinka bwabo cikalamba.—Mateo 5:12.