Ifya Kucita Nga Twakalipa

BUSHE inshita shimo mulatungululwa na matontonkanyo yabipa? Bushe mulafulwa, ukukalipa, nelyo ukukuntukilwa bwangu? Bushe amasakamika ya mikalile yalamwansha? Cinshi cingamwafwa?

Ukukalifiwa kwaba lubali lwa fyo umuntu apitamo. Nga ca kuti twalama ubukali, kuti calenga ubumi ukuwama. Baibolo yena itila: ‘[Ukutitikisha, NW] kulengo wa mano ukubo watumpa.’ (Lukala Milandu 7:7) Apo twaikala mu calo umo ulukaakala na masanso fyaseeka sana, bonse tulakalifiwa pa mulandu wa fitucitikila. Lelo, Baibolo na kabili yatila: “Takuli icisuma ukucile ca kuti umuntu asamwe mu mulimo wakwe.” (Lukala Milandu 3:22) Kanshi, pa kuti tuipakishe ubumi sana, tulekabila ukusambilila ifya kuba ne nsansa, kuti twacite fyo nga twaba ne nkuntu ishisuma. Nomba kuti twateesa shani inkuntu ishingatunosha no kucincintila inkuntu shalubana?

Ilingi line, ukucitako ifintu fimo kulacefyako ukukuntukilwa. Ku ca kumwenako, nga twasakamikwa ne fintu fimo ifyo tushingacitapo nangu cimo, kuti cawama ukuleka ukutontonkanyapo nelyo ukufuma pali ico cifulo ukucila ukulasakamikwa fye? Ukwendaukako, ukumfwa inyimbo shanakilila, ukutukusha umubili, nelyo ukucitila umuntu uuli mu kukabila ifya nkumbu kuti kwalenga mwapemwinako kabili kuti kwamuletela insansa.—Imilimo 20:35.

Lelo inshila yawamisha iya kupwishishamo amatontonkanyo yabipa kucetekela Kabumba wesu. Ilyo amatontonkanyo yabipa yatwalilila ukwisa, tulekabila ‘ukupoosa amasakamika yesu yonse pali Lesa,’ ukupitila mwi pepo. (1 Petro 5:6,7) Baibolo itweba ukuti: “Yehova aba mupepi na ku baputuke misana . . . ifibi ifiponeno walungama fingi, lelo kuli ifyo fyonse Yehova alamupokolola.” (Amalumbo 34:18, 19) Bushe kuti twacetekela shani ukuti Lesa kuti ‘atwafwa no kutupokolola?’ (Amalumbo 40:17) Kuti twacita ifyo pa kulasambilila Baibolo no kulatontonkanya pa fya kumwenako fya cine cine ifyalembwa mu Baibolo pa fyo Lesa asakamana ababomfi bakwe.