Bushe ‘Mwalicindama Kuli Lesa’?

YESU Kristu apeele ifilangililo ifingi nga nshi ifilenga abantu ukutontonkanyapo sana, pali ifyo filangililo paba na cimo icilanda pa muntu umukankaala uwakwete ibala. Pa kuti ifintu fikamuwamine ku ntanshi, uyu mukankaala atontonkenye mu mutima wakwe ukukuula amatala ayakalamba nga nshi. Lelo muli cilya cilangililo, Yesu aitile ulya muntu ukuti “ciwelewele.” (Luka 12:16-21) AmaBaibolo yalekanalekana yabomfya ishiwi lya kuti umuntu “watumpa.” Nga cinshi babomfesha amashiwi yaluma umusango yu?

Nakalimo ni pa mulandu wa kuti uyu muntu umukankaala taletontonkanya pali Lesa ilyo alepanga ukucita ifintu; kabili taletootela na Lesa pa fya kulya ifingi ifyo asombwele. (Mateo 5:45) Lelo ena aleitakisha ati: “We mweo, nukwata ifisuma ifingi ifya myaka iingi; ale tuusha, ulye, unwe, uipakishe.” Cine cine, uyu muntu alemona kwati nga akwata ifintu ifingi, kuti fyamucingilila nge “cibumba icasansuka.”—Amapinda 18:11.

Umusambi Yakobo asokele abantu ba matutumuko ya musango yu ilyo alembele ati: “Aleni, mwe batila: ‘Leelo nelyo mailo tukaya ku musumba ulya tukekaleko umwaka umo, tukacite amakwebo no kunonka ifyuma,’ lelo tamwaishiba ifyo ubumi bwenu bukaba mailo. Pantu muli fubefube uumoneka akashita kanono no kwanduluka.”—Yakobo 4:13, 14.

Ifyalandile Yakobo, e fyacitikile ulya muntu umukankaala uwa mu cilangililo ca kwa Yesu, pantu bamwebele ati: “We ciwelewele we, leelo ubushiku balekupoka umweo obe. Nga kanshi ifyo watutila fikaba fya kwa ani?” Ulya muntu umukankaala ali no kufwa, e kutila ubumi bwakwe bwali no kwanduluka kwati ni fubefube ninshi ne fintu alepanga ukucita tafilacitika no kucitika. Bushe cinshi twasambililako kuli ici? Yesu atile: “E fyo caba ku muntu uwaitutilila ifyuma lelo uushaba uwacindama kuli Lesa.” Nga imwe, bushe ‘mwalicindama kuli Lesa?’