Balashimikila Imbila Nsuma Kuli Bacibulu

“BASAMBILISHA abantu ifya mu Baibolo!” Ayo e mashiwi yalandile umukalamba wa pa ng’anda basungila abakoloci mu mushi wa Navalcarnero, mu musumba wa Madrid, ku Spain, ilyo alelondolola umulimo wa Nte sha kwa Yehova abatandala pali ilya ng’anda apo abombela. Cinshi calengele ukuti alande fyo?

Bamo abekala pali ilya ng’anda iyo beta ati Rosas del Camino ni bacibulu. Lelo apo baNte balisambilila ululimi lwa bacibulu ulwa bena Spain, balalanshanya na bacibulu abekala pali ilya ng’anda. Umukalamba wa pa ng’anda alitashishe nga nshi baNte pa fyo balesambilisha abantu abalekabila ukusambilila ifya mu Baibolo ukwabula no kubalipilisha. Alimwene ifyo abekala pali ilya ng’anda banonkeelemo ilyo baumfwa imbila nsuma ya Bufumu. Kabili abekala pali ilya ng’anda, sana sana balya abashumfwikisha e lyo na bashimwensekesha, na bo bene balicindamike sana uku kutandala kwa baNte.

Ba Eulogio, abekala pali ilya ng’anda, tabamona kabili ni bacibulu, lelo balasambilila Baibolo ne Nte sha kwa Yehova. Bushiku bumo ilyo balesambilila, shikulubantu umo aletele ipepala limo ifi kuli Nte. Pali ilyo ipepala, epo abekala pali ilya ng’anda balembele amashiwi ya kutasha. Umutwe wa lyashi balembele waleti: “Inte sha kwa Yehova.” Amashiwi yamo ayalipo yaleti: “BaNte balekala bwino kabili bali-icindika, kabili bafumya amano yabo kuli Yehova. Cila nshita balatandalila abantu pa mayanda pantu balicetekela Yehova.”

Cine cine, ukucetekela Yehova e kwalenga no kutila baNte abengi mu calo conse basambilile ululimi lwa bacibulu ulwa mu fyalo bekala. Nga basambilila, balatendeka ukwebako bambi ubu bukombe ubwa nshita isuma iya ku ntanshi ubusangwa mu Baibolo.