“Good News for People of All Nations”

AKATABO kali pano kafumine pa Kulongana kwa Citungu ukwa Nte sha kwa Yehova ukwa mu 2004 ukufika mu 2005 ukwaleti, “Endeni na Lesa.” Aka katabo kakwata amabula 96, mwaba ubukombe ubwayanguka ukumfwa ubwalembwa mu ndimi 92, kabili kalembwa ku kwafwa mu kubilisha imbila nsuma ya Bufumu ku bantu abengi sana. (Mateo 24:14) Ifya kumwenako fyakonkapo filelanga icicitika ilingi ilyo aka katabo kabomfiwa.

• Ilyo ulupwa lumo ulwa Nte sha kwa Yehova lwapokele aka katabo pa kulongana kwa citungu, baile ku fifulo fitatu uko batengela inama. Basangileko abantu ba ku India, ku Netherlands, ku Pakistan na ku Philippines. Abalume batile: “Nangu ca kutila aba bantu balelandako iciNgeleshi panono, balitemenwe ilyo twabalangile ubukombe mu lulimi lwabo, pantu baali ukutali sana na ku fyalo fya ku mwabo. Balimwene bwino bwino ifyo umulimo wesu ubombwa mwi sonde lyonse na fintu twaikatana.”

• Nte umo alangileko akatabo ku o babomba nankwe uwafuma ku India. Alitemenwe ukumona indimi shonse ishaba muli aka katabo kabili abelengele ubukombe mu lulimi lwakwe lwine. Ici calengele ukuti balelanshanya sana ifya mu Baibolo. Umbi uo babomba nankwe uwafuma ku Philippines, na o alipapile ukusanga ululimi lwa ku mwabo muli aka katabo kabili ici camulengele ukufwaya ukwishiba na fimbi pa Nte sha kwa Yehova.

• Ku Canada, umwanakashi umo uwafuma ku Nepal alisumine ukusambilila Baibolo na Nte pali lamya lelo talefwaya ukuti Nte aleya ku ng’anda ku mwakwe. Nomba, ilyo uyu Nte aebele ulya mwanakashi ukuti kuli akatabo akabamo ubukombe bwa mu lulimi lwa ciNepali, ulya mwanakashi alitemenwe kabili aebele Nte ukuti aye ku ng’anda ku mwakwe. Alefwaisha ukuimwena ubu bukombe mu lulimi lwakwe! Ukutula lilya line, isambililo lya Baibolo lilatungululwa pa ng’anda ya ulya mwanakashi.