Balikotele Lelo Tabatalalilwe
UMUNTU nga akota, amaka yalapwa, kabili abengi tabatemwa ukuba pamo na bantu bambi. BaFernand Rivarol abafwile ilyo bali ne myaka 95 mu Geneva, mu calo ca Switzerland bena tabali fyo iyo. Baleikala beka, pantu abakashi babo balifwile, e lyo umwana wabo umwanakashi na o alyupilwe kabili ali-ikwatile ing’anda. Nangu cingatila ilingi line baleikala fye pa ng’anda pa mulandu wa kuti balikulile sana, tabaletalalilwa. Ilingi baleikala mu muputuule wa kutushishamo baletumina abantu amafoni ukulanda na bo icebo kwa Lesa.
Pa nshita imo ilyo baFernand bali abalumendo balibakakilepo. Cinshi calengele ukuti babakake? Mu mwaka wa 1939, Inkondo ya Calo iya Bubili yalitendeke mu Bulaya, kabili e lintu fye baFernand na bakashi babo baishileba Inte sha kwa Yehova. Balikonkele ifyo basambilile mu Baibolo, ukukanalwisha umuntu uli onse. Pa mulandu wa kukanafwaya ukucite fyo, baFernand balibatamfishe ncito kabili balibakakile imiku iingi. Babakakile imyaka 5 na hafu yonse pamo. Pali iyi nshita bashile abakashi babo e lyo no mwana umunono beka.
Ilyo baFernand baletontonkanya pa fyabacitikile kale batile: “Ku bengi camoneke kwati nalilekele incito iisuma nga nshi no kusha ulupwa lwandi lulecula fye. Balinsuulile kabili balemona kwati nali umuntu umubi sana. Nangu cibe ifyo, nga natontonkanya pali iyo myaka iya macushi, ndebukisha bwino bwino ifyo Yehova atutungilile ne fyo atwafwile. Napapita imyaka iingi sana ukutula apo ico cacitikile, lelo nalitwalilila ukushintilila pali Yehova nge fyo nacitile ilya nshita.”
Icitetekelo ca musango yo ico baFernand bakwete cabalengele ukuti baleshimikilako bambi pali foni pe subilo basambilile ukufuma mu Baibolo. Nga ca kuti balanshanya no muntu kabili atemwa ifyo balanshanya, balemutumina impapulo shilanda pali Baibolo. Lyena pa numa, baletuma foni kuli uyo muntu pa kuti beshibe nga ca kuti alitemenwe ifyo abelengele mu mpapulo bamutumine. Limo limo abantu bamo balebwesha amakalata ukutasha pa mpapulo babatumine, ne ci calebaletela insansa.
Nalimo na imwe bene kuti bamutumina foni kuli bamo nga filya baFernand balecita, mukwai mukakutike ku fyo bakasosa pa kuti mukeshibe ifyo basuminamo. Inte sha kwa Yehova kuti batemwa ukulanshanya na imwe ifyo basuminamo.