“Mukwai Pokeleleni Ubupe Bwandi Ubunono”

AYA mashiwi yali muli kalata iyo batumine kwi ofeshi ilya Nte sha kwa Yehova mu Russia. Iyi kalata batumine pamo ne cibokoshi umwali insokoshi ishatikama isho bapikwile fye.

Abatumine ubu bupe ni baAlla. BaAlla ni baNte abali ne myaka 67, kabili baba mu cilonganino icabela ku kabanga ka Russia. Balibombela Yehova pa myaka ukucila 10, kabili balicincila mu kushimikila imbila nsuma ya Bufumu. Lelo ilyo ubulwele bwa lupuma bwabekete, bwalengele babe no bulebe. Ukutemwa kwa baAlla kwalenga balepashanya Dorka, Umwina Kristu wa mu nshita ya batumwa, uwalebilila abasumina banankwe imingila.—Imilimo 9:36, 39.

Muli kalata baAlla balembele, batile: “Amolu yandi yalifwa, lelo amaboko yena yalabomba. Kanshi pa kushimikila nemba fye amakalata.” Kabili balandile ukuti: “Natontonkenye ukuti apo amaboko yandi yacili yalebomba, nalapikule nsokoshi ishatikama sana. Ndefwaya bamunyina na bankashi abakalakuula Amayanda ya Bufumu ku ncende shatalala sana pamo nga ku kabanga ka Russia na ku Siberia bakalefwala.”

Ilyo Yesu Kristu alelanda ku basambi bakwe aba cine, atile: “Muli ici e mo bonse bakeshibilo kuti muli basambi bandi, nga mwaba no kutemwana.” (Yohane 13:35) Ukutemwa nga kulya baAlla balangile eko abasambi ba cine aba kwa Yesu beshibikilwako.