Bushe Ubufumu bwa kwa Lesa Cinshi?

CINSHI Yesu alelandapo sana ilyo aleshimikila? Yesu umwine atile aishile mu kubila Ubufumu bwa kwa Lesa. (Luka 4:43) Abaleumfwa ifyo alesosa, ukwabula no kutwishika balemona ukutila alelandapo sana pa Bufumu. Bushe calebapapusha? Bushe balemwipusha ukuti Ubufumu cinshi? Iyo. Mu mabuuku ya Mbila Nsuma, tamwaba ifi fipusho. Bushe ninshi abantu abengi balishibe Ubufumu bwa kwa Lesa?

Kwena, Amalembo ya kale ayo abaYuda bacindike ukuti ya mushilo, yalilondolwele ubu Bufumu, kabili yalilandile na bwino bwino ifyo bwali no kwisacita. Nga filya fine amalembo yayafwile abaYuda ukwishiba Ubufumu, na ifwe bene pali lelo fingi twingasambilila pa Bufumu nga tulebelenga Baibolo. Natulande pa fishinka 7 ifyo Baibolo itusambilisha pa Bufumu. Ifishinka fya kubalilapo fitatu abaYuda baliko mu nshiku sha kwa Yesu na lintu Yesu talaisa pano calo balifishibe. Kabili fitatu ifyalakonkapo, abalenga tufishibe, ni Kristu na batumwa bakwe ilyo bali pa calo. Icishinka ca kulekelesha cena, caisaishibikwa muno nshiku shesu.

1. Ubufumu bwa kwa Lesa buteko bwa cine, ubukabako umuyayaya. Ubusesemo bwa mu Baibolo bulanda ukutila Lesa akatuma uwa kulubula abantu ba cishinka. Uyu muntu uwitwa ati “ubufyashi,” akafumyapo amafya yonse ayaisa pano calo pa mulandu wa bucipondoka bwa kwa Adamu, Efa, na Satana. (Ukutendeka 3:15) Pa numa ya myaka iingi, Davidi Imfumu ya cishinka balimwebeleko fimo ifisuma pali ubu “bufyashi” nelyo uyu Mesia. Aali no kuba Imfumu ya Bufumu bwa kwa Lesa. Ubu Bufumu bukapusanako na mabufumu yambi. Bwena bukekalilila umuyayaya.—2 Samwele 7:12-14.

2. Ubufumu bwa kwa Lesa bukafumyapo amabuteko ya bantu yonse. Mu cimonwa kasesema Daniele amwene, mwali amabufumu yakwatisha amaka aya pano calo ne fyo yakonkene ukuteka ukufuma fye ku kale ukufika muno nshiku. Umfweni ifyo Daniele amwene ifyamucincimwishe sana: “Mu nshiku sha shamfumu ishi [Ishamfumu sha bantunse isha kulekeleshako] Lesa wa mu muulu akemyo bufumu ubushakonaulwe umuyayaya, no bufumu bwa buko tabwakashiilwe ku bantu bambi; bukashonaula no kupesha aya mabufumu yonse, kabili bukeminina umuyayaya.” Kanshi amabufumu yonse nelyo amabuteko yonse, pamo ne nkondo, umutitikisha, na mafisakanwa ya muli cino calo fikafumapo umupwilapo. Nga fintu ubusesemo bwaba pa cikomo cakonkapo bulanda, Ubufumu bwa kwa Lesa bwalitendeka kale ukuteka ku muulu, kabili nomba line buli no kuteka isonde lyonse. (Daniele 2:44, 45) Ubu bufumu bwa cine cine kabili e buteko fye bweka ubukashala pano calo.a

3. Ubufumu bwa kwa Lesa bukafumyapo inkondo, amalwele, ifipowe, pamo ne mfwa iine. Amasesemo ya mu Baibolo aya kucincimusha yalatulangilila ifyo Ubufumu bwa kwa Lesa bukacita ilyo bukateka lino isonde. Ala ubu bufumu ifyo bukacita fikawama ica kuti tapali ubuteko nelyo akabungwe pano calo akengacita ifya musango yo. Elenganyeni ukuti ifyanso fyonse ifya nkondo muno calo nafyonaulwa umupwilapo! Baibolo itila: “Aputulo bulwi ukufika ku mpela ya calo.” (Amalumbo 46:9) Takwakatale akuba badokota, ifipatala, nelyo amalwele ayali yonse. “Umwikashi wa mu calo takasose, ati, Nindwala.” (Esaya 33:24) Takwakatale akuba ifipowe, insala, ubulwele bwa nsala, nelyo ukwikala ne nsala. Baibolo itila: ‘Mukaba ukupaka kwa ngano mu calo.’ (Amalumbo 72:16) Takwakabe ifililo, ukuceesha pa fililo, inshiishi, amasaini, nelyo ifyabipa ifili fyonse ificusha abantunse. Nangu fye ni mfwa iine iya tuteka imfine, nayo mu kulekelesha ikapwa umupwilapo. Lesa “akamine mfwa ukumina kwa pe. Shikulu Yehova akafuuta ne filamba pa finso fyonse.”—Esaya 25:8.

4. Lesa e wasala Kateka wa Bufumu bwakwe. Mesia taibika fye umwine pa bufumu kabili te bantunse abamusala. Yehova Lesa umwine e wamusala. Na malumbo yakwe aya kuti Mesia nangu Kristu yalangilila ukuti asalwa na Lesa. Aya malumbo yonse yabili, yalola mu kuti “Uwasubwa.” Kanshi Yehova e wasuba nelyo ukusala iyi Mfumu ukuba pali ici cifulo. Lesa alanda pali iyi mfumu ukuti: “Moneni umubomfi wandi, uo ntungilila, uwasalwa wandi, uo umutima wandi ucankilwa; nimbiko mupashi wandi pali wene, ku kuleka afumishe ubupingushi ku nko.” (Esaya 42:1; Mateo 12:17, 18) Ala mwandini Kabumba wesu alishiba bwino bwino Imfumu yalinga ukututeka!

5. Kateka wa Bufumu bwa kwa Lesa alilanga abantu bonse ukuti akabateka bwino. Yesu umwina Nasarete alilangile ukuti e Mesia uo batile akesa. Lesa alilandile no lupwa umo akafuma. (Ukutendeka 22:18; 1 Imilandu 17:11; Mateo 1:1) Ilyo aali pano calo, afikilishe amasesemo ayengi ayo balembele kale sana ayalelanda pali Mesia. Ne shiwi ukufuma ku muulu lyalilandile ukuti e Mesia. Nga cali shani ifyo? Lesa umwine e walandile ukufuma ku muulu ukuti uyu aali Mwana wakwe; bamalaika na bo batile Yesu e Mesia uo Lesa atile akesa; kabili Yesu alicitile ne fisungusho ifyalangilile apabuuta tuutu ukutila aleficitila ku maka ya kwa Lesa. Na kabili, imiku iingi aleficita ninshi pali na bantu abengi sana abalemonako.b Imiku iingi Yesu alilangilile ifyo akacitila abantu ilyo akaba Kateka. Alikwete amaka ya kwafwilisha abantu kabili alefwaya no kubafwilisha. (Mateo 8:1-3) Alebika sana amano ku bantu, aali ne cikuuku, aali uwashipa, kabili uwaiceefya. Fyonse ifyo acitile pano calo fyalilembwa muli Baibolo pa kuti abantu bonse balefibelenga.

6. Ba 144,000 e bakateka pamo na Kristu mu Bufumu bwa kwa Lesa. Yesu atile kukaba na bambi abakateka nankwe ku muulu pamo na batumwa bakwe bene. Aitile aba bantu ukuti “umukuni unono.” (Luka 12:32) Inshita imbi, umutumwa Yohane balimwebele impendwa ya aba bantu aba mukuni unono ukuti bakaba 144,000. Bakabomba umulimo uusuma sana ku muulu, bakaba ishamfumu kabili bashimapepo pamo na Kristu.—Ukusokolola 5:9, 10; 14:1, 3.

7. Ubufumu bwa kwa Lesa bwalitendeka kale ukuteka ku muulu, kabili nomba line bukatendeka ukuteka icalo conse. Ici cishinka ca kulekelesha twalandapo, caba pa fintu ifisuma sana ifyo twingatemwa ukwishiba. Baibolo ilatweba ifishinka ifingi ifitulanga ukuti Yesu balimupeela amaka ya kuba Imfumu ku muulu. Ino ine nshita tulimo, aleteka ku muulu, kabili nomba line ali no kutendeka ukuteka ne calo conse kabili akafikilisha amasesemo ayakankaala ayo tulandilepo kale. Lelo bushe kuti twashininkisha shani ukuti Ubufumu bwa kwa Lesa buleteka ino ine nshita? Kabili ni lilali bukatendeka ukuteka icalo conse?

[Amafutunoti]