Abantu Balafwaya Ukwishiba Ico Babela Pano Calo

“Muno nshiku tulakwata ifingalenga tuleikala bwino, kabili tulakwata ne fisuma sana ifyaleafya kale ukusanga, pamo nga amayanda ayasuma, ifilimba fya lulumbi, e lyo ne myotoka. Ici cilalenga twalayipusha ‘ico’ twabela pa calo. Cinshi abantu balwishisha ukwikala bwino ukucila abanabo? Busuma nshi bwabamo?”—David G. Myers, uwasambilila ukutontonkanya kwa bantu, uwaba pa Hope College, ku U.S.A., e walandile aya mashiwi.

KUTI mwayasuka ati shani ifi fipusho ifyo David G. Myers aipwishe? Bamo bamona kwati kupoosa fye nshita ukufwaya ifyasuko. Lelo nga mwasuulako fye kuli ifi fipusho, cimo na filya cingaba umuntu nga asuulako fye ilyo utumabwe twaingila mu nsapato afwele. Kuti atwalilila ukwenda lelo kwena twakulamukalifya.

Nga mulatontonkanyapo ukutila kwaliba ifyo twabela pano calo, ala te imwe mweka. Akabungwe kakalamba akafwailisha sana pa fyo abantu bacindamika mu mikalile katile, mu fyalo ifingi, abantu abaletontonkanyapo “pa co twabela pano calo” baleyabalefulilako.

Nga mulefwaya ukukanaba na malangulushi, mufwile ukusanga amasuko ku mepusho aya yatatu ayacindama sana.

Ni kwi fwe bantu twafumine?

Cinshi twabela pano calo?

Bushe icalo cikaba shani ku ntanshi?

Ni kwi mwingasanga ifyasuko kuli ifi fipusho fyacindama? Ukucila ukulanda fye ifya mu mutwe wesu nelyo ifyo abantu bambi balanda, ifipande fyalakonka pali ici fyalalanda pa fyasuko fyaba mu Cebo ca kwa Lesa, Baibolo. Tulemukoselesha ukukupukula Baibolo yenu pa kuti muimwene mwe bene ifyo ilanda.