Bushe Mwalimwishiba Shinwe wa ku Muulu?

BUSHE mwalibeshiba bwino bashinwe? Ici cipusho kuti caumfwika kwati tacilolelemo nga ca kuti mwakulile mu lupwa ulusuma. Nalimo kuti mwa-asuka, amuti, ‘Ee, nalibeshiba bwino!’ Ca cine, abantu abengi balishiba ifyo bashibo batemwa ne fyo bapata, ifyo bacita nga kwacitika fimo, e lyo ne fyo basunga ulupwa.

Lelo, nalimo kwali inshita ilyo mwapapile sana ukumona bashinwe bacita ico mushabalile amubamonapo ukucita. Kuti nalimo umwana aishiba fye ukuti bawishi bantu abashilanda sana kabili abafuuka. Nomba nga kwacitika fimo ifyapumikisha fye, e lyo umwana engamona ukuti kanshi bawishi balishipa kabili balafwaisha ukucingilila ulupwa lwabo.

Nga Kalenga wesu, bushe ena mwalimwishiba bwino? Baibolo itweba pali Lesa ati: “Muli wene e mo tubela no bumi no kusunkana no kubako.” (Imilimo 17:28) Lesa e watupangile; kanshi kuti twatila e Wishi wa bonse aba mweo. (Esaya 64:8) Nga ca kuti na imwe mwaishiba ati Lesa ni Shinwe, ninshi cili fye bwino pantu e fyo cifwile ukuba. Nomba kuli na fimbi ifingi ifyo tufwile ukwishiba no kusambilila pali ena kabili nga twacita ifyo, tukanonkelamo no kuba ne nsansa.

Ifyo mutontonkanya pali bashinwe ne fyo mwabacindika cikonka ne fyo mwabeshiba. E fyo caba na kuli Lesa. Nga mwamwishiba bwino, e lyo mukapalama sana kuli ena. Nga mwaishiba Lesa bwino no kusambilila ukucita ukufwaya kwakwe, kuti amwafwa ilyo mulepita mu mesho na mu mafya.

Bushe Lesa aba shani? Bushe imibele akwata ilingile ukumulenga ukulatontonkanya shani pali ena? Bushe mufwile ukucitapo fimo nga mwamwishiba? Mwalasanga ifyasuko kuli ifi fipusho mu cipande cikonkelepo.

[Amashiwi pe bula 3]

Ifyo mwaishiba bambi kuti fyalenga mwabapalama nelyo ukubataluka