Palameni Kuli Lesa
“Ine, ne Yehova Lesa obe, Ndeikata Ukuboko Kobe Ukwa ku Kulyo”
ILYO wishi no mwana bapalama apa kuti bacilukile umusebo umupita sana imyotoka, wishi aeba umwana ati: “Njikata ku kuboko.” Umwana taleumfwa umwenso pantu ukuboko kwa maka ukwa kwa wishi nakumwikata. Bushe kuti mwatemwa umuntu ukumwikatako ku kuboko no kumutungulula nelyo ukumucingilila ilyo mulepita mu mafya ya muli cino calo? Nga kuti mwatemwa, ninshi amashiwi yalembele Esaya kuti yamusansamusha.—Belengeni Esaya 41:10, 13.
Abena Israele e bo Esaya ale-eba aya mashiwi. Nangu ca kutila Lesa alemona uluko lwa bena Israele ukuba ‘icipe cakwe ica mutengo,’ bashingulwikwe na balwani. (Ukufuma 19:5) Bushe abena Israele balekabila ukutiina? Yehova abomfeshe Esaya ukubeba amashiwi ayali no kubakosha. Ilyo tulelanshanya aya mashiwi, tuleibukisha ukutila yalabomba na ku Bena Kristu muno nshiku.—Abena Roma 15:4.
Yehova abebele ukuti: “Witiina.” (Icikomo 10) Yehova alishibe umulandu alandile aya mashiwi. Alilondolwele umulandu abantu bakwe bashalekabila ukutiina. Atile: “Pantu ndi na iwe.” Yehova taba ukutali, ica kuti esa fye ku kwafwa umuntu nga ca kutila akwata amafya. Afwaya abantu bakwe ukwishiba ukuti lyonse alaba nabo, ku kubafwa. Ukwishiba ukuti Yehova alaba na ifwe lyonse, kulatusansamusha nga nshi!
Na kabili Yehova aebele ababomfi bakwe ukuti: “Wilasakamana.” (Icikomo 10) Ishiwi lya ciHebere ilyo bapilibula ukuti “wilasakamana,” kuti lyalosha ku bantu “abalolesha konse konse pa kuti bamone nga ca kutila kuli ifyabipa ifingabacitikila.” Yehova alilondolwele umulandu abantu bakwe bashalekabila ukulolesha uku no ku pa mulandu wa mwenso ukuti: “Pantu nine Lesa obe.” Bushe kuti kwaba icingatusansamusha ukucila pa kwishiba ukuti Yehova ni Lesa wesu? Yehova e “Wapulamo,” kabili “Wa Maka Yonse.” (Amalumbo 91:1) Apo Lesa wabo Yehova wa maka yonse, tabalekabila ukutiina!
Nomba finshi ababomfi ba kwa Yehova bengenekela kuli ena? Alaya ukuti: “Nkakutungilila no kuboko kwandi ukwa ku kulyo ukwa bulungami.” (Icikomo 10) Alaya no kuti: “Ine, ne Yehova Lesa obe, ndeikata ukuboko kobe ukwa ku kulyo.” (Icikomo 13) Bushe finshi mutontonkanyapo nga mwaumfwa aya mashiwi? Icitabo cimo cilondolola ukuti: “Ifi fikomo fibili filenga twatontonkanya pa mufyashi no mwana. [Umufyashi] tacingilila fye umwana nga ca kutila kwaba ubwafya, lelo alaba pamo nankwe; te kuti asuminishe bambi ukuti basende umwana wakwe.” Taleni tontonkanyeni, Yehova takabale apaatukana na bantu bakwe, nangu bengaba na mafya ya musango shani.—AbaHebere 13:5, 6.
Amashiwi yalembele Esaya kuti yasansamusha nga nshi ababomfi ba kwa Yehova muno nshiku. Muli shino “nshita ishayafya nga nshi,” limo kuti twakwata amafya aya kuti teti twishibe ne fya kucita. (2 Timote 3:1) Lelo twalikwata uwa kutwafwa. Yehova aliitemenwa ukwikata ukuboko kwesu no kutwafwa. Nga filya fyaba abaice abacetekela abafyashi babo, kuti twaikata ku kuboko kwakwe ukwa maka, ukucetekela ukuti akatutungulula mu nshila yalungama no kutwafwa ilyo twaba na mafya.—Amalumbo 63:7, 8.
Amalembo ya kubelenga mu January: