Bushe Abantu Bamo Batila Armagedone Cinshi?

“Kabili fyashilonganike ku cifulo iciitwa mu ciHebere Armagedone.”—UKUSOKOLOLA 16:16.

Bushe cinshi mutontonkanyapo nga mwaumfwa ishiwi lya kuti “Armagedone”? Nalimo mutontonkanya pa kayofi akakalamba aka kuti kaonaula ifintu nakalya nakalya. Nangu ca kutila ili shiwi lisangwa fye umuku umo mu Baibolo, balalilandapo sana pa milabasa, mu manyunshipepala, pa TV, na kuli bashimapepo.

Bushe ifyo abantu baishiba pali Armagedone filomfwana ne fyo Baibolo isambilisha? Nacicindama ukwishiba icasuko. Mulandu nshi? Pantu nga mwaishiba icishinka pali Armagedone tamwakaletiina icitiine-tiine, mukakwata isubilo kabili cikalenga mukeshibe bwino ifyo Lesa aba.

Tontonkanyeni pali aya mepusho yakonkapo yatatu, no kulinganya ifyo abantu batontonkanya pali Armagedone ku fyo Baibolo isambilisha.

1. BUSHE ARMAGEDONE KAYOFI AKACITIKA PA MULANDU NE NCITILO SHA BANTUNSE?

Bakalemba we lyashi na bafwailisha ifintu ilingi balabomfya ishiwi lya kuti “Armagedone” nga balelanda pa tuyofi utucitika pa mulandu ne ncitilo sha bantunse. Ku ca kumwenako, beta Inkondo ya Calo iya Kubalilapo ne ya Bubili ukuti Armagedone. Ilyo ishi nkondo shapwile, abantu balisakamene ukuti icalo ca America ne ca Soviet Union bakatendeka ukulwa ukubomfya amabomba ne fyanso ifyakwatisha amaka. Abasabankanya amalyashi baleita iyi nkondo iyali no kubako ukuti “Armagedone ya manyukiliya.” Muno nshiku, abafwailisha ifintu abatiina ukuti ukukowesha isonde kukalenga imiceele ukwaluka sana, balasoka abantu ukuti nomba line kuli no kuba “Armagedone.”

Umo balosha pali ifi balanda: Abantu e bakwata amaka pa fikacitikila isonde na fyonse ifyabapo. Nga ca kutila ubuteko tabucitilepo nangu cimo, isonde likonaikilila.

Ifyo Baibolo isambilisha: Lesa takaleke abantunse ukonaula isonde. Baibolo yalanda ukuti Yehovaa tapangile isonde “apa fye.” Lelo alipangile ukuti “lileikalwamo.” (Esaya 45:18) Lesa takaleke ukuti abantu bakonaule isonde, lelo “akonaula abaleonaula isonde.”—Ukusokolola 11:18.

2. BUSHE ARMAGEDONE KAYOFI?

Limo bakalemba we lyashi babomfya ishiwi lya kutila “Armagedone” nga balelanda pa tuyofi utukalamba. Ku ca kumwenako, mu 2010 ilyo icinkukuma icikalamba caonawile ifintu mu Haiti no kwipaya abantu abengi sana no kuleta ubucushi ubukalamba pa bashele, kalemba we lyashi umo atile mu “Haiti mwalicitike Armagedone.” Bakalemba we lyashi na bapanga amafilimu tababomfya fye ili ishiwi nga balelanda pa fyacitika kale, lelo balalibomfya na lintu balelanda pa fintu fya kutiinya ifikacitika ku ntanshi. Ku ca kumwenako, balabomfya ishiwi lya kuti “Armagedone” nga balelanda pa fikacitika ilyo planeti beta ukuti asteroid ikapunka isonde.

Umo balosha pali ifi balanda: Armagedone ikonaula abantu fye bonse, ababi na basuma. Tapali nangu cimo ico umuntu engacita pa kuti tafwile kuli Armagedone.

Ifyo Baibolo isambilisha: Armagedone tayakepaye abantu icipayeipaye. Lelo bantu fye ababipa e bakonaulwa. Baibolo yalaya ukuti, pashala fye panono “umubifi takabepo; awe ukalolekesha apo aali, no kusanga talipo.”—Amalumbo 37:10.

3. BUSHE LESA AKONAULA ISONDE PA ARMAGEDONE?

Abantu abengi abaya ku mapepo basumina ukuti kukaba inkondo iikalamba iya kulekelesha pa kati ka bantu ababifi na basuma kabili icikafumamo ca kutila isonde lyonse likonaika. Ifyo akabungwe ka Princeton Survey Research Associates aka mu America kafwailishe, filanga ukuti mupepi na hafu ya bantu basumina ukuti isonde likonaika pa “nkondo ya Armagedone.”

Umo ifi basambilisha fyalola: Lesa tapangile abantu ukuti bakekale pe sonde umuyayaya, kabili ne sonde line talipangile ukuti likekalilile. Apekenye ukuti inshita nga yafika, abantu bonse bakafwe.

Ifyo Baibolo isambilisha: Baibolo yalilanda fye apabuuta ukuti Lesa ‘ashimpile isonde pa cifulo ca liko icapampamikwa; talyakatelentenshiwe umuyayaya, umuyayaya.’ (Amalumbo 104:5) Na kabili ilanda pa bantu ba pe sonde ukuti: “Abalungama e bakekala mu calo, kabili bakekalamo umuyayaya.”—Amalumbo 37:29.

Nga fintu twamona, ifyo Baibolo ilanda fyalipusana sana ne fyo abengi baishiba pali Armagedone. Nomba bushe Armagedone cinshi?

[Futunoti]