Amafya Abanakashi Bashipikisha
“Nga namona ifyo abanakashi babacusha, nshifwaya ukukula.”—E fyalandile ZAHRA, UULI NE MYAKA 15, muli magazini ya GEO, iya mu ciFrench.
AMASHIWI ya mukashana ayali pa muulu yalelanga ukuti abanakashi mu calo conse balapita mu mafya ayalekanalekana pamo nga ukubapuma e lyo no musobolola. Moneni fimo ifyo bapitamo:
● Umusobolola. Mu Asia, abafyashi abengi bafwaya ukukwata abana abaume ukucila abanakashi. Lipoti ya ba UN iya mu 2011 yatile mu Asia abanakashi mupepi na 134 milioni balifwa pa mulandu wa kuponya amafumo, ukubepaya ilyo bacili abaice, na pa mulandu wa mulekelesha.
● Amasambililo. Pa bantu abapelele mu gredi 4 mu calo conse, abafula sana banakashi.
● Ukulaala nabo ku maka. Abanakashi ukucila pali 2.6 bilioni bekala mu fyalo umo bamona kwati ukulaala no mukashi ku maka takwalubana.
● Ubumi. Mu fyalo ifipiina, mu mamineti yabili, umwanakashi umo alafwa ilyo ali pa bukulu nelyo pa kupaapa pa mulandu wa kubulisha ifipatala.
● Ukukwata impanga. Nangu cingati abanakashi e balima ukucila pali hafu ya fya kulya mu calo, mu fyalo ifingi tabakwata insambu sha kukwata nelyo ukupyana impanga.
Mulandu nshi abanakashi babatanina insambu sha musango yo? Mu fyalo fimo bakonka imipepele umo bacusha nelyo umo bamona kwati ukucusha abanakashi nelyo fye ukubapuma kwaliba fye bwino. Inyunshipepala ya ku France yalandile pali loya wa ku India, Chandra Rami Chopra uwatile: “Imipepele yonse yaba fye cimo cine: Yalikwata amafunde ayasuminisha ukuba no musobolola ku banakashi.”
Bushe na imwe e fyo mutontonkanya? Bushe mumona ukuti Baibolo ilasuusha abanakashi, nge fyo ifitabo fya mu mipepele imbi ficita? Bamo batila, amalembo yamo aya mu Baibolo e fyo yalanda. Bushe Lesa uo balandapo mu Baibolo amona shani abanakashi? Nangu ca kuti ili lyashi lilakalifya abengi, ukuceeceeta bwino bwino ifyo Baibolo ilanda kuti kwatwafwa ukwasuka ifi fipusho.
[Abatusuminishe Ukubomfya Icikope pe bula 3]
© G.M.B. Akash/Panos Pictures