Ababelenga Ino Magazini Balepusha Ukuti . . .

Bushe Umuntu Kuti aba fye ne Nsansa nga ca Kuti Aupa Nelyo Ukuupwa?

▪ Bushe Baibolo isambilisha ukuti pa kuti umuntu abe ne nsansa kano aupa nelyo ukuupwa? Nga twabelenga fye amashiwi ya ntendekelo mu Baibolo kuti twamona kwati e fyo Icebo ca kwa Lesa cilanda. Cinshi cingalenga twalamona ifyo?

Ukulingana ne fyo Baibolo ilanda mwi buuku lya Ukutendeka, Lesa amwene ukuti ‘tacali icisuma’ kuli Adamu ukulaikala eka. E ico Lesa abumbile Efa uwali “umunankwe” wa kwa Adamu. (Ukutendeka 2:18) Na kabili, mu Baibolo mwaliba amalyashi ayengi ayalanga ukuti icupo kuti caleta amapaalo ayengi ne nsansa. Ica kumwenako cimo lyashi ililanda pali Ruti.

Lelo, bushe aya malyashi yabelako ku kutusambilisha ukuti Abena Kristu ilelo te kuti babe ne nsansa kano fye nga baupana no kukwata abana? Awe, te fyo caba. Pa bantu baliko pa calo, Yesu Kristu e muntu uwali sana ne nsansa. Nangu cibe fyo tabalile opa mpaka ne mfwa. Yesu, uwali na mano sana ukucila abantu bonse pano calo, alepashanya sana Yehova, “Lesa wa nsansa.” (1 Timote 1:11; Yohane 14:9) Yesu alisokolwele ifingalenga umuntu ukuba ne nsansa nelyo ukupaalwa muli cino calo. (Mateo 5:1-12) Icupo tacali pa fintu alandilepo.

Bushe ninshi, Baibolo ilaipilika nga yalanda pa cupo? Awe. Tufwile ukwishiba umulandu Yehova abikileko icupo. Nangu ca kuti Lesa abikileko icupo pa kuti abantu balesangamo insansa, bucibusa, e lyo ne cisansamushi, icupo na kabili calyafwa ukufikilisha ubufwayo na bumbi ubwa kwa Lesa. Ku ca kumwenako, Lesa afwaile ukuti Adamu na Efa ‘bakafyalane, ukufula, no ku kumana pe sonde.’ (Ukutendeka 1:28) Adamu tali na kufikilisha ubufwayo bwa kwa Lesa eka, nangu fye ni Efa wine tali na kufikilisha ubu bufwayo eka. Lelo, bonse babili balekabila ukutungililana.

Na kabili, Yehova alibomfeshe icupo ne ndupwa ku kufikilisha ubufwayo bwakwe ubwakumine uluko lwa bena Israele. Alefwaya uluko lwakwe ukukula pa kuti tabalucimfishe ku balwani. Na kabili afwaile ukuti mu mukowa wa kwa Yuda mukafume Mesia uwali no kulubula abantu bacishinka ku lubembu ne mfwa. (Ukutendeka 49:10) Kanshi abanakashi bacishinka abena Israele balemona ukuupwa no kufyala abana ukuti lyali lishuko ilikalamba nga nshi. Cali museebanya, kabili calelenga baba no bulanda nga ca kuti tabopilwe no kufyalapo abana.

Inga muno nshiku, caba shani? Bushe ifunde lya kwa Lesa ilya kale na kale ilya kufwaya abantu ‘ukukumana isonde,’ lifwaya Abena Kristu ba muno nshiku abekala pe sonde apafula abantu ukuupa no kufyala abana? Awe. (Mateo 19:10-12) Na kuba Lesa pali ino nshita tacingilila ulupwa nelyo uluko umufwile ukufyalilwa umupusushi, Mesia. E ico, bushe Abena Kristu bafwile ukumona shani icupo no bushimbe?

Icupo no bushimbe, fyonse fibili bupe ukufuma kuli Lesa. Ca cine ukuti bambi kuti batemwa ukuupa nelyo ukuupwa, lelo bambi nabo kuti batemwa ukuba fye abashimbe. Yehova e wapekenye ukuti kube ukuupana kabili icupo kuti calenga mu lupwa mwaba ukutemwana na bucibusa. Lelo, na kabili Baibolo itila abopa no kuupwa muli cino calo cabipa bakaba na mafya nelyo “bakaba na macushi mu bumi bwabo.” Nomba nga kulanda pa bushimbe, Yehova tamona ukutila ubushimbe bufwile ukulenga umuntu ukuseebana nangu ukuba no bulanda. Icebo cakwe cisosa ukuti ukuba umushimbe kwaliwama muli fimo fimo ukucila ukuupa nelyo ukuupwa.—1 Abena Korinti 7:28, 32-35.

Kanshi Baibolo ilalondolola bwino ukuti fyonse fibili, icupo no bushimbe fyalicindama. Yehova uwateyenye ukuti kube ukuupana afwaya ababomfi bakwe bonse ukuba ne nsansa nampo nga bashimbe nelyo balyupa nelyo ukuupwa.