Ababelenga Ino Magazini Balepusha Ukuti . . .
Bushe ukuba ne citetekelo kulasumina fye ifili fyonse pa kuti mumfweko bwino?
▪ Ukuba ne citetekelo pa kutila fye umuntu omfweko bwino kuibepa fye pantu kulalenga umuntu asuula ku fishinka no kuleka ukutontonkanya bwino. Ku ca kumwenako, abantu bamo bamona kwati ukunwa ubwalwa kulacefyako amafya. Pa kubala, ubwalwa kuti bwalenga umuntu ukuicetekela no kulamona kwati kuti apwisha amafya akwete. Lelo mu kuya kwa nshita abatemwa ukubomfya ubwalwa muli uyu musango balailetela amafya. Bushe ifi e fyo caba na ku kuba ne citetekelo muli Lesa?
Abantu bamo bamona kwati ukuba ne citetekelo butuutu sana. Batila abafwaya ukuba ne citetekelo tabafwaya ukuitontonkanishisha kabili basumina fye icisuminesumine ukwabula ne fishinka. Abalanda ifi na kabili batila abasumina sana mu fya mapepo tabafwaya ukusumina mu fintu fya cine cine.
Baibolo yalilandapo sana pa kuba ne citetekelo. Lelo tapaba nangu pamo apo itukoselesha ukuti tufwile ukulasumina fye icili conse ico twaumfwa nelyo ukukanafwaya ukutontonkanyapo sana pali ifyo fintu. Lelo ilanda pa bantu abasumina fye icili conse ico baumfwa ukuti tabaishiba nangu cimo kabili bapumbu. (Amapinda 14:15, 18) Ala bupumbu ukusumina fye icili conse ico twaumfwa ukwabula no kufwailisha bwino ifishinka! Ciba kwati kufwaya ukuciluka umusebo umupita sana imyotoka ninshi na mushibata pantu fye kuli bamo abamwebele ukucita ifyo.
Ukucila ukulakonka fye ifili fyonse ifyo twaumfwa, Baibolo itweba ukuti tufwile ukucenjela pa kuti tatubepelwe. (Mateo 16:6) Te kuti tubepwe nga ca kuti tulebomfya ‘amaka yesu aya kupelulula.’ (Abena Roma 12:1) Baibolo itusambilisha ukuti ilyo tushilasumina icili conse, tufwile intanshi ukupelulula pa fyo batwebele nga fishinka. Natulande pa fya kumwenako fimo ifyo umutumwa Paulo alembele.
Ilyo Paulo alembeele aba mu cilonganino ca mu Roma, talefwaya ukuti basumine muli Lesa pa mulandu fye wa fyo abebele. Lelo abakoseleshe ukuti bafwile ukutontonkanya pa fintu ifilanga ukuti Lesa e ko aba. Alembele ukuti: ‘Pantu imibele ya kwa Lesa, ukutula fye apo abumbile umuntu, bailukila ku fyo abumba, muli ifi e mo belukila amaka yakwe aya pe pamo na buLesa bwakwe, ica kuti [abakaana amaka yakwe] tabakwata umwa kubepesha.’ (Abena Roma 1:20) Ifyo Paulo alembele ku bena Roma fyalyampana ku fyo alembele ku baHebere. Alembele ukuti: “Ca cine, ing’anda yonse muntu akuula, lelo uwapangile ifintu fyonse ni Lesa.” (AbaHebere 3:4) Paulo akoseleshe Abena Kristu abaleikala mu musumba wa Tesalonika ukuti tabafwile ukulasumina fye ifili fyonse. Lelo alefwaya ukuti ‘baleshininkisha ifintu fyonse.’—1 Abena Tesalonika 5:21.
Umuntu uwakwata icitetekelo icishashimpwa pa bushininkisho bwine bwine kuti aumfwako fye bwino pa nshita iinono lelo ico kuti camulenga abepwa kabili kuti camuletelela. Ilyo Paulo alelanda pa bantu bamo abaleitunga ukupepa Lesa abaliko mu nshiku shakwe, alembele ukuti: “Nababela inte nati ukupimpa kwa kubombela Lesa kwena balikwata; lelo te kupimpa ukwalingana no kwishiba kwine kwine.” (Abena Roma 10:2) Kanshi nacicindama ukuti tumfwile ukufunda uko Paulo afundile Abena Kristu abali mu cilonganino ca bena Roma! Abafundile ati: “Mupilibuke pa kwalula amatontonkanyo yenu, pa kuti mushininkishe mwe bene ico Lesa afwaya, icisuma, icapokelelwa kabili icapwililika.” (Abena Roma 12:2) Icitetekelo icashimpwa pa kwishiba kwine kwine ukwa kwa Lesa cikaba nge “nkwela iikalamba” iikatucingilila ku fingonaula bucibusa bwesu na Lesa.—Abena Efese 6:16.
[Icikope pe bula 23]
Icitetekelo caba nge nkwela iya kutucingilila