Ifingalenga Ukuti Mucetekele Lesa
ELENGANYENI ukuti mwalikwata umunenu uo mwatemwa sana, lelo acita ifintu fimo ifyo mwafilwa ukwishiba umo filolele. Bamo balengulula ifyo acicita e lyo no mulandu acicitila ifyo fintu kabili bamumona no kuti munkalwe. Bushe na imwe kuti mwalengulula umunenu apo pene fye, nelyo bushe kuti mwabala mwaumfwa umulandu acicitila ifyo? Nga ca kuti talipo pa kuti alondolole icacilenga acite ifyo, bushe te kuti mutekanye ukucila ukumusuusha?
Ilyo mushilalandapo icili conse, nalimo kuti cawama mwaishiba ifishinka. Kuti cawama ukutontonkanya pa fyo mwaishiba umunenu ne calenga ukuti mu mutemwe. Ifi fine e fyo mwingacita na pa kufwaya ukwishiba nampo nga Lesa munkalwe nelyo iyo. Tamufwile ukwangufyanya ukusondolwelela, lelo mufwile ukufwailisha ifishinka.
Nalimo kuti camwafya ukwishiba umulandu Lesa acitila ifintu fimo nelyo mulapapa umulandu afisuminishisha ukulacitika. Abantu abengi kuti bamweba ukuti Lesa munkalwe kabili kuti bafwaya na imwe mulemumona kwati munkalwe. Ilyo mushilasondwelela ukuti Lesa munkalwe, bushe te kuti ciwame mwabala mwaishiba ifingi pali ena? Ee, ifyo mwingasondwelela kuti fyashintilila pa fyo mwaishiba Lesa. Na kabili mufwile no kutontonkanya pa fintu ifisuma ifyo Lesa amucitila.
Nga ca kuti imikalile yenu ya kuculacula fye, nalimo kuti mwalamona kwati Lesa tamutemwa. Lelo baleni tontonkanyeni, bushe Lesa e ulenga amafya mukwata nelyo ena afwaya ukuti ifintu filemuwamina? Nge fyo tulandilepo kale, Satana e “kateka wa pano calo,” te Yehova. (Yohane 12:31) Kanshi ni Satana e walenga amacushi ayengi ayo tumona muno calo e lyo no lufyengo. E lyo kabili ukukanapwililika ne fintu ificitika fye ukwabula ukwenekela na fyo filalenga ukuti tulecula.
Nomba bushe finshi ifyo Lesa acita? Moneni ifyo Baibolo ilanda, itila: Lesa e “Wapangile umuulu ne sonde”; kabili ‘alitupanga mu cipesha amano.’ Yehova ni ‘Lesa uo umupu wesu waba mu minwe yakwe.’ (Amalumbo 124:8; 139:14; Daniele 5:23) Bushe ici calola mwi?
Calola mu kuti Kabumba wesu e watupeela ubumi, kanshi e walenga tubeko. (Imilimo 17:28) E walenga no kuti tuletemwana no kukwata ifibusa, ukuipakisha ifya kulya, ukumfwa bwino ifiunda, ukutonya, e lyo no kununsha. (Yakobo 1:17) Bushe ifi fyonse tuipakisha tafilanga fye ukuti Lesa alitutemwa kabili tufwile no kulamucindika no kumucetekela?
Nangu cibe ifi, nalimo cilamukosela ukucetekela Lesa. Limbi mumona ukuti tamulamwishiba bwino bwino pa kuti mumucetekele. Lelo nga e fyo caba, te kuti tupape. Muli fino fipande, te kuti tulande pali fyonse ifilenga ukuti abantu balemona kwati Lesa munkalwe, lelo kuti cawama nga mwaishibilapo na fimbi pali Lesa.a Tatuletwishika ukuti nga mwacite ifi, mukeshiba icine pali Lesa. Bushe Lesa munkalwe? Awe iyo, “Lesa kutemwa.”—1 Yohane 4:8.
[Futunoti]
a Ku ca kumwenako, nga mulefwaya ukwishibilapo na fimbi pa mulandu Lesa asuminishisha ukucula, belengeni icipandwa 11 mu citabo citila Bushe Cinshi Baibolo Isambilisha? icalembwa ne Nte sha kwa Yehova.
[Icikope pe bula 7]
Bushe Lesa e ulenga amafya mukwata nelyo ena afwaya ukuti ifintu filemuwamina?