ICIPANDE ICIKALAMBA | BUSHE INTE SHA KWA YEHOVA NI BANI?
Bushe Inte sha kwa Yehova bantu ba musango nshi?
Fwe Nte sha kwa Yehova twaba mu fyalo ifingi kabili tatwaba nga ba mu mipepele imbi. Nangu ca kuti amaofeshi yesu ayakalamba yabela ku America, twikala mu fyalo ifyalekanalekana. Na kuba, twalicila pali 8 milioni kabili tulasambilisha abantu Baibolo mu fyalo ukucila pali 230. Tulasambilisha abantu pantu tulomfwila ifyo Yesu atwebele ukuti: “Imbila nsuma iyi iya Bufumu ikabilwa ku bantu bonse aba pe sonde ku kuba ubunte ku nko shonse.”—Mateo 24:14.
Nangu ca kuti twikala mu fyalo ifyalekanalekana, tulakonka amafunde. Na lyo line, tatuibimba mu fya mapolitiki pantu tulomfwila ifyo Yesu aebele Abena Kristu ukuti, tabali ba “muli ici calo.” Ici e calenga twilaibimba mu fya mapolitiki nelyo ukulwako inkondo. (Yohane 15:19; 17:16) Na kuba, ilyo kwali Inkondo ya Calo iya Bubili, ba Nte abengi balibakakile mu fifungo, balibacushishe kabili balibepeye pa mulandu wa kuti balikeene ukulwako inkondo. Uwali shikofu mu German atile: “Ba Nte beka fye e bengalanda ukuti tabaalwileko inkondo.”
“[Ba Nte] balikwata imibele iisuma. Aba bantu kuti twabasala ukuba na bakateka mu fyalo, lelo te kuti basumine. . . . Balacita ifyo aba mu buteko bafwaya, lelo basumina ukuti Ubufumu bwa kwa Lesa e bukafumyapo amafya yonse ayo abantu bakwata.”—Inyunshipepala ya Nová Svoboda iya ku Czech Republic.
Na lyo line, fwe Nte sha kwa Yehova tatuipaatula ku bantu bambi. Yesu alipepeeleko abasambi bakwe kuli Lesa ilyo atile: “Nshilemulomba ukuti mubafumye muli ici calo.” (Yohane 17:15) Kanshi e calenga abantu abengi ku ncende twikalila baletumona tulebomba, tuleya ku matuuka nangu ku sukulu.