Umukululo wa Fipusho

◼ Apo tufwaya ukubomfya impapulo shesu mano mano, finshi twingalulako ilyo tuletambika impapulo mu bunte bwa mu musebo?

Pa kucita ubunte bwa mu musebo, calilinga ukubinga abantu na bamagazini nelyo impapulo mu minwe. Ubuyo bwesu kwesha ukulanshanya na bo bantu. Muli yo nshila kuti twaishiba untu twalanda nankwe nga alefwaya ukumfwa kabili nga ali no kubelenga bamagazini besu. Nga cingacitika ukulanshanya nankwe mu kwipifya icipande cimo muli magazini, kuti cawama. Kuti mwalondolola no kuti umulimo wesu ubombwa na bakabomba ba kuitemenwa kabili te wa kusangilamo indalama, lelo mulimo wa mwi sonde lyonse uwafwilishiwa ne misangulo ya kuitemenwa. Inshita shimo, kasabankanya kuti aendako intamfu inono no yo muntu ilyo balelanshanya pa lwa fili muli magazini ne fyo uyo muntu enganonkelamo.

Lelo, tufwile ukuba abashilimuka kabili abalangulukilako. Bamo tukumanya mu musebo baba abapamfiwa ica kuti kuti catukosela ukwishiba nga balefwaya ukumfwa. Nga cabe fyo, kuti cawama ukubatambika fye trakiti pa kubalamuna insala yabo iya kubelenga impapulo shesu lintu bakatukumanya na kabili ilyo bashipamfiwe sana ica kuti kuti baiminina twalanshanya.

Nga tulekonkanya ukubomba umulimo wa mu musebo no kwiminina pamo pene ne nshita imo ine, abantu bakatwishiba kabili kuti batemwa ukulanshanya na ifwe ilyo bakwate nshita, ne co cikatupeela inshita ya kumona nga balefwaya ukuumfwa nelyo iyo.

Tufwaya ukubomfya impapulo shesu mano mano. Kanshi tulingile ukwesha ukusala inshita yalinga iya kutambikilamo impapulo. Ukucite fyo kukatulenga ukutantika ukuti tukakumane na kabili na balefwaya ukwishibe cine no kubalondolwela imibombele yesu.