Ukusefya kwa Cibukisho Ukwa 1994
1 Ni nshila nshi ikonkwa pa kusefya kwa Cibukisho? Yesu abomfeshe umukate uushatutumuka pa Ca Kulya ca Cungulo ica kwa Shikulu, e co Inte sha kwa Yehova ilelo bacita cimo cine. Umukate wa musango yo waliba uwalinga pantu tawakwatamo icitutumushi (isiti), ico Baibolo ibomfya ku kwimininako ukubosha nelyo ulubembu.—Mona w90-CW 2/15 16-17 ku fyebo fyalundwapo.
2 Ni waini fye uushasundulwa uwakashika uwa myangashi, pamo nga Chianti, Burgundy, nelyo claret, e ulingile ukubomfiwa. Waini wakashika uwa kuipangila kuti pambi abomfiwa nga ca kuti tatumbinkanishiwemo ifyalowa, ifye fungo, nelyo nga ca kuti talengelwe ukuluma.
3 Pa numa ye pepo, umukate ukapishiwamo. Ipepo na limbi likatangilila ukupishiwamo kwa lukombo. Baeluda balingile ukushininkisha ukuti umucinshi naulangwa ku Ca Kulya ca Cungulo ica kwa Shikulu pa kukwata umusango walinga uwa fimpashanya. Impendwa ya mikate nelyo inkombo ne nshila fipishiwamo itantikwa ukulingana ne mibele ya pa mwenu. Icikalamba cili ca kuti ifi fintu fipishiwe kuli bonse abasangilweko, nangu ca kuti abafulilako bakafipisha fye ukwabula ukulyako.
4 Ukusefya kwa ntambi ne fibelesho fyaumina kumo tafibimbwamo. Iyo, pantu pali Mateo 26:26-30 tumona inshila yaanguka intu uku kusefya kwakatama nga nshi kwatendekelwemo na Yesu. (1 Kor. 11:23-26) Takuli ukukabila kwa kufisa ifimpashanya ku numa ya cipembe pa cisebele nelyo ukufimbapo insalu—nga fintu ifilonganino fimo fyacita. Takwaba ukukabila kwa kulisha inyimbo nelyo ukwimba mu kati ka kupitamo kwa fimpashanya. Bakalanda na abo abalecita ukutantika balingile ukukonka amakambisho pali autulaini wa lyashi lya Cibukisho kabili te kwesha ukuletamo ifyeni nelyo imfundo sha pa lwabo.
5 Bakapyunga abapeelwe icishingamo ca kupenda pali uku kulongana no kulongana kumbi bafwile ukucenjela ukuti tabapayenye ifipendo fya kukukumya. Abantu batamfiwa balasuminishiwa ukusangwa ku Cibukisho kabili balapendwa. Nangu cibe fyo, tatupenda ngo ulyako uuli onse uwatamfiwa nelyo uushabatishiwa. Lekeni, lyene, tuloleshe ku ntanshi ku kusefya kwa nsansa pa March 26. Ikaba ni nshita ya kubomfya ukwiluka lelo na kabili inshita ya buseko.—Ukus. 19:7; Yoh. 3:29.