Nomba E Nshita
1 Lintu umutumwa Paulo alembele kalata wakwe uwalenga bubili ku bena Korinti, abacinkwileko ukuti baali nabapingulapo ukubomba umulimo ushaiwamina uwa kukumbusuka mu kwimininako abasumina banabo mu Yerusalemu. Nangu cibe fyo, umwaka walipitile, kabili baali bacili tabalapwisha umulimo watampilwe. E co abacincishe ukuti: “Twalilileni no kupwisha wene: beni abaswatuka ku kupwisha umulimo nga fintu fye mwali pa kutendeka wene.”—2 Kor. 8:11, The New English Bible.
2 Pa nshita imo nelyo iinankwe, ifwe bonse twaliimikilapo amabuyo. Kuti pambi twapingwilepo ukwingilishako ukwakanamo kwesu mu butumikishi bwa mwi bala, ukwishiba bamunyinefwe mu kuwaminako, ukufikapo kwi shuko lya mulimo, nelyo ukucimfya ubunake bumo. Nangu ca kuti twatampile mu kuba na mapange yasuma, pambi tatwakonkenyepo no buyo bwesu. Ilyo tatulailuka cene, imilungu, imyeshi, nelyo fye imyaka pambi yalipitile ukwabula ukutunguluka ukuli konse. Bushe kuti caba ukuti tulekabila ukubomfya kuli fwe bene ukufunda kwa ‘kutwalilila no kupwisha’ cintu twatampile?
3 Ukufika pa Mabuyo Yesu: Cintu cayanguka ukucita ukupingulapo kwa pa lobe lelo calicilapo kukosa ukufikilisha uko kupingulapo. Ukulaalikisha kuti kwatusha ukulunduluka ukuli konse. Tulekabila ukucito kupingulapo kabili lyene ukupampamina ukubombela pali kwene ukwabula ukushingashinga. Ukuteyanya kwa pa lwesu kulakabilwa. Caliba icakatama ukupaatulako inshita ikabilwa ku kupwishishisha umulimo no kushininkisha ukuti inshita naibomfiwa kuli iyo mifwaile. Lyaliba litontonkanyo lisuma ukwimikako ubushiku bwa kupelelapo kabili lyene ukubelesha ukuisalapula ku kushininkisha ukuti bwakumanishiwa.
4 Lintu twafilwa ukukumanisha ubuyo bwesu, caliba icayanguka ukupelulula ukuti: ‘Nkabwelelako limbi.’ Lelo tatwishibe icikacitika ku nshita ya ku ntanshi. Amapinda 27:1 yalondolola ukuti: “Wilatakishisho bushiku bwa mailo; pantu tawishibe ico ubushiku bwingaleta.” Umusambi Yakobo asokele pa lwa kuba uwaicetekela mu kucishamo pa lwa nshita ya ku ntanshi pantu ‘tawaishiba icintu cimo ica mailo. . . . Uwaishibo kucite cisuma kabili tacita, kuli wene cena lubembu.’—Yako. 4:13-17.
5 Mu kuba ne fya kupumbula ifyafulishe fyo capamo no kupinda ukucitwa na bambi, amabuyo yesu kuti mu kwanguka yafimbilikishiwa. Ukubombesha kwasakamanishisha kulakabilwa ku kuyasungilila ayateku mu muntontonkanya. Ukusunga umulandu mu mapepo yesu kwaba ca kwaafwa. Ukulomba bambi abapalamisha kuli ifwe ukutucinkulako no kutukoselesha kuti kwaafwa nga nshi. Ukulemba icishibilo pali kalenda wesu kukabomba nge ca kucinkulako ku kubebeta ukulunduluka kwesu. Umuntu afwile ukupingulapo ku ‘kucita umo apangile mu mutima wakwe.’—2 Kor. 9:7.
6 Umweshi wa October ulepayanya ishuko lya mu nshita ilishaiwamina ku kutontomesha pa mabuyo yesu. Tukalatambika ukulembesha kwesu ukwa atemwa Loleni! nelyo Ulupungu lwa kwa Kalinda nelyo ukwa bamagazini bonse babili. Bushe kuti twaimikako amabuyo yamo ayabamo kupelulula ayali no kufikwapo? Ni shani pa lwa kutukuta ukupoka ukulembesha nangu fye kumo? Ukupingulapo ukucite fipempu fya kubwelelamo ifyafulilako no kutampa isambililo lya Baibolo ilipya kuti yaba mabuyo yabamo kupelulula ku bengi.
7 Tacaba ca mano ukulaalikisha icacindama, apantu pano “isonde paleya.” (1 Yoh. 2:17) Amashuko yaibela na mapaalo mu mulimo wa kwa Yehova e ko fili kuli ifwe pali nomba. Cili kuli ifwe ukushukila fyene.