Lipoti wa Mwaka wa Mulimo uwa 1994

¹ Lipoti wa mwaka wa mulimo uwa 1994 alelangisha ukuti uuli onse aliibikilishako ku kubombesha ukumfwila ukukambisha kwa kwa shikulu ku ‘kubila imbila nsuma’ no kupanga abasambi. (Mat. 24:14; 28:19, 20) Bakasabankanya balishininkishe ukuti balitumine amalipoti mu nshita na bakalemba balonganike no kutuma lipoti wa cilonganino ku Sosaite mu nshita. Bonse tulemutasha pa kwakanamo kwenu muli uyu lipoti ashaiwamina.

² Lekeni tulanguluke imbali shapulamo shimo. Umwaka wapwa icipimo ca pa muulu muli bakasabankanya caliile pa muulu ukufuma pali 80,488 ukufika ku 82,926. Impendwa ya balebatishiwa yalininine ukufuma pali 2,459 ukufika ku 3,552 mu mwaka wapwa ne mpendwa ya basangilwe ku Cibukisho yalileko pa muulu ukufuma pali 362,204 ukufika kuli 363,372, ilintu impendwa ya basangilwe ku mabungano ya citungu yaile pa muulu ukufuma pali 317,357 ukufika kuli 327,856. Tuletasha bamunyina pa kubombesha mu kutungulula amasambililo ya Baibolo kabili impendwa ya yaletungululwa yaile pa muulu ukufuma pali 103,658 ukufika kuli 108,948. Bushe ifwe bonse tatuli abacincimuka ukumona uku kwingilishiwako? Bushe kuliko icili conse cimbi ico tulekabila ukubombelapo mu kati ka mwaka ukonkelepo?

³ Ilintu kuliko ukwingilishiwako muli bakasabankanya na mu masambililo ya Baibolo avareji wa maawala yalepooswa mu butumikishi yalibwelelako pa nshi ica kuti bakasabankanya balefika fye pali avareji wa maawala 9.5, impendwa yacepesha pa myaka yafulilako. Ukushalika bamagazini kutwalilila ukutotobela ica kuti bakasabankanya balefika fye pali avareji wa bamagazini 0.5 pali kasabankanya umo umo. Bushe ifwe bonse kuti twaimikako amabuyo ya kwingilishako inshita tupoosa mu butumikishi cila mweshi? Kuti caba bwino nga ca kuti kasabankanya umo umo engemikako ubuyo bwa kucisha pa maawala 10 nga cingacitika. Bushe uletontonkanye fyo kuti washalikako nangu fye magazini umo, nelyo babili, cila mweshi muli uno mwaka?

⁴ Icacilanapo kucindama, cinshi twingacita ku kwaafwa abana besu ukuba bakashimikila? Mupepi na citika wa abo abasangwa ku kulongana kwesu na mabungano balaya ku sukulu. Bushe bana ba bani? Ubwingi bwabo bana besu. Abafyashi bafulilako, nangu cibe fyo, kuti basosa ifyo abana babo banono nga nshi ku kuba bakasabankanya. Bushe kwalibako umushinku waimikwa apa kutendekela ku bana ukuya na bafyashi mu butumikishi bwa mwi bala? Bushe balingile intanshi ukuba bakasabankanya bashabatishiwa ilyo tabalakonka abafyashi babo mu butumikishi? Iyo, ico tacifwaikwa kabili takwabako umushinku waimikwa apa kutendekela ku bana ukuya na bafyashi babo. Umo uwa bakangalila besu aba fitungu, ku ca kumwenako, alesenda umwana mwanakashi wakwe Dorcas mu butumikishi kabili mu kupita kwa nshita aishibe ifya kushalika Icitabo Candi ca Malyashi ya mu Baibolo. Eluda na umbi alasenda umwana mwaume wakwe uushilatendeka isukulu uwe shina lya Chibasha mu butumikishi kabili uyu kalume alashalika bamagazini na matrakiti pa numa wishi abe namulondolola kuli mwine ŋanda. Abakalamba abengi balasunguka ukumfwa abana banono balecitilo bunte kabili kuti bakutika kuli bene mu kusakamanishisha nga nshi ukucila fintu bengakutika ku bakalamba. E co, te kwesha ukusondwelela ukuti abana benu bali abanono nga nshi aba kukanamukonka mu butumikishi na ku masambililo yenu aya Baibolo. Bakansheni ukubelengela abene mayanda amalembo ne fya kuyalondolola. Uku kukansha kulingile ukutwalilila ukufikila uwacaice afikapo ukuba kasabankanya ushabatishiwa. Kwena ukukansha kukatwalilila pa numa ya ico nga fintu twingacita ku uuli onse uwasanguka kasabankanya.

⁵ Umukululo wa Fipusho mu Ubutumikishi Bwesu Ubwa Bufumu ubwa October 1992 waipwishe ukuti: “Kufika ku cipimo nshi pambi abana banono aba bafyashi ba Bwina Kristu bengakana mu butumikishi bwa mwi bala pa ntanshi tabalaishibikwa nga bakasabankanya bashabatishiwa?” Wayaswike ukuti: “Abafyashi ba Bwina Kristu bafwaya abana babo ukulunduluka ukuba ababomfi bakosoka, abaipeelesha aba kwa Yehova. (1 Sam. 2:18, 26; Luka 2:40) Nangu fye ni pa mushinku wa kubangilila nga nshi, abana mu finshingwa-ŋanda fya Bwina Kristu balingile ukuba na maka ya kucita ukulumbulula kwaumfwika mu kucingilila icitetekelo cabo icashimpwa pali Baibolo. Ukukula kwa ku mupashi ukwa bana kulakwankwanishiwa ilyo baleshindika abafyashi babo mu butumikishi bwa mwi bala ukufuma ku bwaice. Lelo caliba icakatama ku bacaice ukukuntwa ukufuma ku mutima nga bali no kuipakisha umulimo wa mwi bala, ukufwaisha ukuba bakasabankanya bashabatishiwa, kabili ukutwalilila ukwakana mu mulimo wa kushimikila Ubufumu. Ukukansha kwasakamanishisha ku bafyashi kulafwaikwa. (1 Tim. 4:6; 2 Tim. 2:15) Bakasabankanya bafikapo bambi kuti pambi baafwilisha limo limo nga ca kuti abafyashi bali mu kusuminishanya.—Moneni Ubutumikishi Bwesu, amabula 99-100.

⁶ “Ilyo abana bafundwa bwino bashindika abafyashi babo aba Bwina Kristu mu mulimo wa ku ŋanda ne ŋanda, balasambilila ifya kuibimba mu butumikishi. Lelo tabakeshibikwe nga bakasabankanya bashabatishiwa ukufikila balundulula icipimo cimo ica maka no kulamuka ifya pa lwabo. Abafyashi ba Bwina Kristu kuti bapingulapo nampo nga kufika ku cipimo nshi umwana engakanako mu kucitilo bunte ilyo balebombela capamo. Abana abashilati beshibikwe nga bakasabankanya bashabatishiwa tabalingile ukuya mu kushimikila pa lwabo nelyo ukushindika abana bambi mu mulimo wa mwi bala. Abafyashi kuti bapekanishisha abana babo umulimo wa mwi bala kabili ukubasuminisha ukwakanamo mu nshila ishingi, pamo nga ukubelenga ilembo, ukutambika trakiti nelyo magazini, nelyo ukulangisha mwine ŋanda icikope muli lumo ulwa mpapulo. Ilyo umwana alekulilako, kuti pambi akwata amaka ya kwakanamo ukufika ku cipimo cakulilako mu kulanshanya.

⁷ “Mu kuba no kukansha kwalinga, abacaice balasambilila ukutesekesha ukukatama kwa butumikishi ilyo baleankulako ku butungulushi bwa bafyashi babo no kuisungilila abene mu musango wayana. Abafyashi tabalingile ukusha abana babo abashilati beshibikwe nga bakasabankanya bashabatishiwa pa kukumana kwa mulimo wa mwi bala, ukwenekela bambi ukubasakamana. Abafyashi baangwako balishiba icishingamo cabo ica pa lwabo ica kwangalila imibombele ya bana babo. Kwena, bakasabankanya bambi abashingamwa pambi kuti baba abaitemenwa ukwaafwa mu kukansha abana banono mu cilonganino abalangisha ubuseko bwa cine cine mu kubombela Yehova mu butumikishi.”

⁸ Bala elenganya ubwingi bwa bakasabankanya bengabako mwi bala nga ca kuti ulupwa lumo na lumo lwakatamike ukukakililwako kwa kusambilisha abana babo bonse ukushimikila kabili mwandi bunte bwa maka aba abacaice bengapeela mwi bala na pa sukulu. Wipembelela ukufikila abana bobe bapwisha isukulu pa kutampa ukubakansha lelo tampila ku bwaice, tampa nomba. Lekeni cibe buyo bwesu mu 1995 ukumona ukwingilishiwako ukufuma intanshi ku ndupwa shesu shine ukucila ukupoosa inshita pa bantu bambi epela. Nga fintu ilembo lyesu ilya mwaka liletukoselesha, shi natupampamine pa kuti indupwa shesu shikabe ‘ishakuminkaniwa mu kutemwa,’ ukubombela capamo mu kulobolola kukalamba.—Kol. 2:2.