Citeni Fyonse ku Kucindika Lesa
1 Fintu caba ica kupembesula ukubishanya na bamunyinefwe batemwikwa ne nkashi! (1 Kor. 16:17, 18) Tulacite ci pa kulongana, pa kulongana kukalamba, pa mabungano, na mu butumikishi bwa mwi bala. Na kabili tulabishanya pa tushita twa kwisha fye, pamo nga lintu abeni batutandalila pa mwesu. Ilyo tulecite ci, tulalangisha icileela no kukoseleshanya. (Rom. 12:13; 1 Pet. 4:9) Lintu mulepekanya imitebeto ya bwinga, ibukisheni ukufunda kushaiwamina ukwa mu Ulupungu lwa kwa Kalinda ulwa October 15, 1984.
2 Ukwangalila Capamo Kwateyanishiwa: Nampo nga ‘tulelya nalimo tulenwa, nalimo conse ico tulecita,’ tulingile ‘ukucita fyonse ku kucindika Lesa.’ (1 Kor. 10:31-33) Uku kufunda takukonkwa kuli bamo, na muli fyo amafya yatwalilila ukwimako pa mulandu wa kubungana pamo ukwa kwangalila capamo ukwakulisha ica kuti bafilwa ukwangalila bwino. Mu milandu imo, imyanda ya bantu balalaalikwa ku kusefya kumo ukukalamba uko ifya kusekesha fya ku calo fisangwa. Ukubungana kwa musango yo takupusana sana no kwa ku calo, ukwakwata umupashi uushumfwana no muyano ne fishinte fya Baibolo.—Rom. 13:13, 14; Efes. 5:15-20.
3 Calyumfwika ukuti Inte ishingi shalibunganina mu fikuulwa fya kusonkela umwali ifya kusekesha fyabipa kabili ifya ku calo kabili ukushali ubwangalishi busuma. Pa mulandu wa kuti calyafya ukwangalila amabumba yafulisha aya musango yo, amafya yalimako. Ulubuli, ukunwesha ifya kunwa fikola, na bucisenene fye inshita shimo e fyafumamo. (Efes. 5:3, 4) Ukubungana kwa kwangalila capamo ukwasangwa ifintu fya musango yo takucindika Yehova. Mu cifulo ca ico, kuleta umuseebanya pe shina lisuma ilya cilonganino no kupunwisha bambi.—1 Kor. 10:23, 24, 29.
4 Abena Kristu bakoseleshiwa ukuba aba cileela, lelo icikalamba cilingile ukuba kukoseleshanya kwa ku mupashi. (Rom. 1:11, 12) Utumabumba tunono utwa kwisha fye ilingi line e tusuma. Icitabo ca Ubutumikishi Bwesu pa mabula 135-6 cisoso kuti: “Inshita shimo, indupwa shimo shimo limbi kuti shaitwa ku ŋanda ku kubishanya kwa bwina Kristu. . . . Mu kubamo kupelulula, abo abali bashibweni muli iyo milandu bafwile ukuyumfwo kushingamwa kwa pa lwabo ku filecitikako. Mu kuba ne ci mu muntontonkanya, abena Kristu bailuka balimona amano ya cipimo apakupelesha amabumba ya musango uyo no butali bwa kukolongana.” Yesu alangilile ukuti nga ca kuti ubuyo bwesu buli kukoselesha ifibusa fyesu lwa ku mupashi tacilekabila ukupekanya ifyapikana.—Luka 10:40-42.
5 Cisuma sana ukuba aba cileela ku Bena Kristu banensu. Nangu cibe fyo, kuti cacilapo kuwama nga ca kuti akalibumba kali akalinga mu ŋanda mu mwesu ukucila icilibumba cishaikulila mu cikuulwa ca kusonkela uko umupashi wa ku calo uli uwamonekesha. Lintu walaalika bambi ukuba abeni bobe, ulingile ukushininkisha ifyo uli no kushingamwa na conse icili no kucitika.—Mona Ulupungu lwa kwa Kalinda ulwa August 15, 1992, amabula 17-20.
6 Mu cine cine, Yehova alitupaala mu kuba na bamunyina abatukoselesha mu kupembesula uko kutucincisha ukutwalilila ukubombe milimo isuma. (Mat. 5:16; 1 Pet. 2:12) Pa kuba abafuuke kabili abakondenkana ukukuma ku lwa kwangalila capamo, lyonse tukalacindika Lesa wesu no kuba aba kukuulilila kuli bambi.—Rom. 15:2.