Ukwaafwa Abana Besu Ukwikalilila mu Cine—Ulubali 1

¹ Kuti Cacitwa: Cili icawamisha nga nshi ukumona ukwingilishiwako kushaiwamina ukwa bakasabankanya uko twaipakisha muno Zambia mu myaka ya nomba line. Cili icamonekesha ukuti Yehova alepaala umulimo wesu, nga fintu fye Paulo alondolwele pali 1 Abena Korinti 3:6 ukuti: “Ine nalilimbile, Apolo alitapilile, lelo ni Lesa e wameseshe.”

² Lelo ukufumyako ibala lyesu ilya cinkumbawile, twalikwata ibala na limbi ilikalamba umwingafuma bakasabankanya ba Bufumu na bambi, ne lyo ibala lyaba bana besu bene! Amakumi ya makana ya bana balekulila mu finshingwa-ŋanda fya Bwina Kristu. Bushe tulebombelamo muli ili bala lya bengasanguka bakasabankanya? Cilemoneka kwati tatulebombelamo.

³ Ukufwailisha mu Masukulu ya ku Boarding: Mu kufwailisha kwacitilwe mu masukulu ya boarding 45 aya muno Zambia, mwali bakasabankanya bonse pamo 113, lelo imisepela 280 iya myaka ya bukulu pa kati ka 13 ukufika kuli 19 baali tabalaba bakasabankanya. Ukulundapo, kwali imisepela iya mushinku umo wine iyalesekelela, kabili cili icapalishako ukuti ubwingi bwa iko yafuma ku ndupwa sha Nte sha kwa Yehova. Abafyashi bamo, ukusanshako fye na baeluda bamo, bayumfwe fyo abana babo bacili baice ica kuti te kuti babe bakasabankanya.

⁴ Ibukisheni, uku kuli kutolaulamo fye kwa kulangilila. Kulelangilila ukuti abacaice abengi abafikile pa mushinku untu bengaba bakasabankanya tababa bakasabankanya. Nga ca kuti aba bonse baali abacincila mu butumikishi bwa mwi bala ino nshita nga tulependa bakasabankanya ukucila muli ba 100,000 muno Zambia! Kangalila wa muputule umo atile pe sukulu lya boarding limo ilyaba mu muputule wakwe paba abakashana 79 abafuma ku ndupwa sha Nte. Tapali nangu umo uwa bene uwabatishiwa kabili ni 10 fye pali aba e bakasabankanya bashabatishiwa. Tapali nangu umo uwa bene uusangwa ku kulongana. Alipokele ulusa ku mukalamba we sukulu pa kuti bengalakwata ukulongana mu kalasi. Nangu cibe fyo, ici tacili cishingamo ca bakangalila ba miputule.

⁵ Icili ica kusakamika ukucilisha ca kuti bamo pali aba bene abacaice ni ba mwana eluda nelyo ababomfi batumikila. Umulingo umo uwa kuba umubomfi utumikila walilondololwa pali 1 Timote 3:12 ukuti: “[Ababomfi batumikila, NW] babe . . . abateka bwino abana babo na ’ba mu ŋanda yabo iine.” Ukulingana ne cikomo 4, eluda alingile ukuba “uuteka bwino aba mu ŋanda yakwe iine pa kuba na ’bana bakwe mu kunakila kabili aba mucinshi muli fyonse.” Mu kushininkisha, aba baume balingile ukutungulula mu kukansha no kutungulula abana babo ku kuba ababomfi ba kwa Yehova. Ni shani fintu eluda nelyo umubomfi utumikila engaba ica kumwenapo cisuma kuli bambi nga ca kuti abana bakwe wena tabayako mu butumikishi? E co imwe baeluda na babomfi batumikila, nga ca kuti abana benu tabalati babe bakasabankanya, langulukeni uyu mulandu mu kusakamanisha kabili mu kubamo ipepo.

⁶ Tabatungululwa Amasambililo ya Baibolo: Icishinka na cimbi ica kubombomanika icalangililwe no kufwailisha ukwacitilwe na bakangalila ba miputule cili ca kuti abafyashi abengi tabasambilila nelyo ukuya mu kushimikila na bana babo. Abana besu bamo tabakwata impapulo shesu isha pa lwabo ilintu bambi nangu fye ni Baibolo tabakwata. Abo ababa ku masukulu ya ku boarding bakabila ukukwata ukulembesha kwa pa lwabo ne fitabo fimbi. Abafyashi bamo bafwaya abana babo ukupoosesha amano ku masomo ya ku mubili pantu batiina ukuti nga basanguka bakasabankanya ninshi bakapona amashindano. Abafyashi bambi abakwata abana ku masukulu ya ku boarding tabatandalila baeluda kuli ico cifulo ku kwipusha pa lwa fintu abana babo balebomba lwa ku mupashi nelyo ukubatantikilako ukulasangwa ku kulongana. Mu mashiwi yambi, aba bacaice tabanonkelamo mwi sambililo lya lupwa ku kubaafwa ukulunduluka mu cine. We cintu ulabipa! Te ca kupapa kanshi ico bashilatendekela umulimo wa kushimikila.

⁷ Ukubombesha kwalundwapo kulekabilwa: Ukwabulo kutwishika ukubombesha kwalundwapo kulekabilwa ku bafyashi, ukucilisha nga ca kuti ni baeluda nelyo ababomfi batumikila. Satana ne calo cakwe aletitikisha abacaice besu ilelo, kabili abengi balelubila mu calo. Tuleafwa abapya ukwingilila ku mwinshi wa ku ntanshi uwa Ŋanda ya Bufumu, ilintu abana besu bene balefumina ku mwinshi wa ku numa.

⁸ Tulecincisha, ee, ukupaapaata imwe mwe bafyashi ukubebeta mu kusakamanisha ukumona ico mulecita ku kwaafwa abana benu ukuba mu nshila ya kuya ku mweo. (Amala. 6:6, 7; Mat. 7:13, 14) Nga ca kuti pali ino nshita tamusambilila na bo, tampeniko nomba line. Nga ca kuti tabalati babe bakasabankanya, langulukeni icingacitwa ku kubaafwa ukutendeka mu kwangufyanya nga nshi. Mu fipande fya ku ntanshi muli kuno kukonkana, tukalangilila inshila ibomba iyo mwingakonka mu kwafwilisha abana besu ukwikalilila mu cine.