Ukwaafwa Abana Besu Ukwikalilila mu Cine Ulubali 2—Pa Kusanguka Bakasabankanya ba Bufumu

¹ Mu lubali 1 ulwa uku kukonkana, ifya kufumamo fyalipeelwe ifya kufwailisha ukwalelanga ukuti impendwa ikalamba nga nshi iya bana ababa na bafyashi mu cine tabali bakasabankanya. Bamo aba bene baba mu ndupwa sha baeluda na babomfi batumikila. Na kabili, ubwingi bwa ishi ndupwa tashikwata amasambililo ya lyonse aya lupwa. Muli luno lubali twalalanguluka inshila na lintu tulingile ukulenga abana besu ukutendeka umulimo wa mwi bala.

² Ukupekanishisha Abana ku Mulimo wa mwi Bala: Takuli ukukabila kwa kushingilisha ukusenda abacaice besu mu mulimo ukufikila baba mu myaka ya bupungwe. Kuti batendekela pa mushinku wa bwaice nga nabafikapo. Mwilabacincintila nga ca kuti nabakwata ubwishibilo no kufwaisha kwa kubombela Yehova. Nakalimo kuti balufya uko kufwaisha no kupanga ukufwaisha kumbi ukulundululwa na Satana ne ci calo. Baeluda balekabila ukubombela pamo lintu balebebeta nga ca kuti abacaice nabafikapo. Tabalingile ukuleshiwa pa mulandu fye wa kuti bali abanono mu myaka.—Ilu. 148:12, 13; Mat. 21:16.

³ Nakalimo abafyashi bamo tabalaumfwikisha fintu bengalenga abana babo ukutendeka ukuya mu mulimo. Ulubali ulutila “Ukwafwilisha Abacaice,” ukutendeka pe bula 99 ilya citabo ca Abateyanishiwa ku Kupwilikisha Ubutumikishi Bwesu, lulalanga ica kucita. Lintu abana babo baiteyanya ukupendwa nga bakasabankanya, umufyashi alingile ukutununuka umo uwa baeluda aba muli komiti wa mulimo uwa cilonganino (kangalila wa kutangilila, kangalila wa mulimo, nelyo kalemba). Cikatantikwa ukuti baeluda babili bakakumane no mwana na bafyashi ku kupima nampo nga uyo mwana naiteyanya ukucita lipoti. Ifikasanshiwa mu fili no kulangulukwapo fyaba fishinka pe samba lya kamutwe kanono akatila “Ukukumanye Fifwaikwa” pa mabula 97-99. Abafyashi kuti pambi bafwaya ukulanshanya ifipusho fyalinga ifyaba pali aya mabula no mwana mu kubangilila. Kwati fye ni fintu Umusambi mupya uwa Baibolo uuletendeka mu mulimo wa mwi bala ashikabila ukwishiba kwa kufika apatali ukwa cine, mu kupalako abana tabalingile ukucincintilwa nga nabakwatako ukumfwikisha kwa cine ca kutendekelako, nga baleikala ubumi bwa mibele yatambalala, kabili nga balefwaisha ukubombela Yehova.

⁴ Ukusansha pa kulundulula ukufwaisha kwa mu bana ukwa kwakana mu kucincila mu butumikishi bwa Bwina Kristu, abafyashi kuti bapayanya ifintu ifibomba ifyo abana bakabila. Ku ca kumwenako, bushe umwana aliikwatila Baibolo wakwe umwine? Baibolo ilafwaikwa te mu mulimo fye mweka lelo na mu kulongana. Pa mulandu wa mafya ya fya ndalama, abafyashi kuti pambi bashimunuka ukushitila abana amaBaibolo. Lelo kuti caba kuseekesha kwa cuma ukushaiwamina kabili kuti cakoselesha abana no kubimbula ukulunduluka kwabo ukwa ku mupashi. Kuti cawama na kabili ku bafyashi ukupayanishisha abana ifyola fya mu butumikishi. Ici na co cikakoselesha abacaice ukulayakana mu mulimo wa kushimikila. Kwena, abana balekabila ukusambilishiwa ubucindami bwa kusunga bwino amaBaibolo yabo ne fyola.

⁵ Ifingi fyalisoswa pa lwa kupekanishisha umulimo wa mwi bala pa kupituluka mu mipeelele ngo lupwa. Ici tacikosha fye ukuicetekela mu bana besu, lelo na kabili cilabaafwa ukwishiba cintu bakasosa kuli mwine ŋanda. Pamo fye nga fintu abana bengaipekanishisha bwino ku lyashi lya busambi, e fyo bengapekanya ne mipeelele pe sambililo lilipo nelyo icipande ca muli magazini. Bambi mu lupwa kuti babomba nga abene ba ŋanda, no kwimyako ukukaanya kwalekanalekana ukwaseeka mwi bala. Ulupwa kuti lwaipakisha ukucite ci capamo. Abafyashi kuti bacite fyafula ku kulenge ci ukube ca kusekesha.

⁶ Ukupayanya kushaiwamina nakucitwa ku kusuminisha abacaice aba musango yo ukwakana mu butumikishi bwa Bwina Kristu: tulesuminishiwa ukubasenda mu mulimo nangu line cilepilibulo kuti abantu batatu bali no kubomba pamo. Nga ca kuti bonse balecitilo bunte, bonse kuti bacita lipoti inshita. Ku ca kumwenako, nga ca kuti umukalamba abomba na bana banono babili, bonse batatu kuti bacita lipoti imibombele. E fyo cifwile ukuba na lintu abakalamba babili babomba no mwaiceko. Ici cikacilengo kwangukako ku bacaice ukutendeka ukuya mu butumikishi no kwakanamo libili libili, ukucilisha nga te bakalamba icalinga ukuti bengabomba beka. Indupwa shikalamba shikafwaya ukushukila uku kupayanya ili line fye.

⁷ Ee, abana benu kuti pambi baba na maka ya kutendeka mu mulimo nomba. Nga ca kuti nabakwata ukumfwikisha kwakumanina ukwa cine ku kulumbulula cintu basumina kabili nga balefwaisha ukubombela Yehova, mulandu nshi mushingeshibishisha baeluda pa kuti bengatantika baeluda babili ukubepusha ifipusho ukumona nga nabafikapo?

⁸ Lelo, cinshi cingacitwa ku kwaafwa abana besu ukulunduluka mu cine? Isambililo lya Baibolo ilya lupwa e ca kwaafwa. Ulubali lukakonkapo ulwa kuno kukonkana lukalanda pa bucindami bwa masambililo ya lyonse aya lupwa na fintu aya yengacilapo kufumamo cimo.