Yehova Atemwa Umupe wa Nsansa

¹ Lintu twalanguluka ukutanununwa kwa maofesi yakalamba aya Sosaite ne fikuulwa fya misambo mu myaka inono iyapita, te mulandu no kubwelele numa ukwa mu fya bunonshi ukwa mu kusaalala kwa calo, tulapapa. Yehova alipayanya indalama shikabilwa ku kupwilikisha uyu mulimo wakwe uukalamba kabili alicite ci ukupitila mu misangulo ya kuitemenwa ukufuma ku filonganino na ku bantu umo umo.

² Twashukila kano kashita ukutasha ifilonganino na bantu umo umo muli cino calo abo libili libili bayafwilisha umulimo wa kwa Yehova lyonse ukupitila mu misangulo ya ndalama. Ku ca kumwenako, lintu twalekuula umusambo upya uwa Zambia, walikuulilwe pa mulandu wa misangulo iyo twapokelele ukufuma ku fyalo fimbi. Lelo cili kutasha ukumono kuti imisangulo imo yalepokelelwa ukufuma muno mwine mu mwesu. Tulatesekesha ukwaafwilisha kuntu twapokelela kabili tulemutasha mu kufumaluka. Yehova afwile na o alimutemwa pa kwafwilisha kwenu umulimo wakwe pantu atemwo “mupe wa nsansa.”—2 Kor. 9:7.

³ Nangu ni fyo, tuleyumfwe fyo kuliko icintu cimo ico tufwile ukuleta ku kusakamana kwenu. Apantu Sosaite tailumbula ukukabila kwa ndalama, bamunyina bamo kuti pambi bayumfwe fyo tulekumanisha ifipooswa fyesu fyonse mu Zambia. Tulecetekela, nangu cibe fyo, ukuti cili icalinga ukumwishibisho kuti TATULEKUMANISHA ifipooswa fya kushimikile mbila nsuma muli luno lubali lwesu ulwe bala. Tuletwalilila ukupokelela ukwaafwa kwa mu fya ndalama ukufuma ku misambo ya mu fyalo fimbi. Ku ca kumwenako, nomba natukwata icimbayambaya ca musango wa Daf ica matani 6 ukufuma ku Britain ica kutwalilamo impapulo ku filonganino icingashitwa pali 22 million Kwacha kabili bamunyinefwe abena Britain e bashitile cene no kucituma kuli ifwe ngo bupe. E fyo caba na ku fibombelo fimbi ifya pa musambo ifyo twapokelela; ni bamunyina ba mu misambo imbi e bafishitile.

⁴ Mu cilolwa ca ici, umo umo uwa ifwe kuti pambi afwaya ukulanguluka ifili imibele yakwe umwine ukukuma ku kwafwilisha umulimo wa Bufumu. Inshita shimo lintu tulelangilila abapya ukuteyanya kwa kwa Yehova, tukomaila pa kuti tatulombelesha imisangulo kabili tatwakwata ne mitantikile ya kupeele ca pe kumi, kabili ico cili ca cine. Lelo pa kwafwilisho kuteyanya kushaikulila kuntu tukwete muli cino calo ne fitabo na bamagazini ifili no kutwalwa ku filonganino, pamo pene ne mpendwa ikalamba iya bakangalila ba fitungu na ba miputule na bapainiya baibela abali no kwafwilishiwa mwi bala, indalama shilafwaikwa. Tulefwaya kanshi ukulangulukapo ngo muntu umo umo ico twingacita ku kwafwilisha umulimo wa kushimikila. Tatufwile ukutontonkanyo kuti ici caba cishingamo ca baba ne fyuma. Yesu atashishe mukamfwilwa pa musangulo wakwe uunono nga nshi. (Luka 21:1-4) Ici cilepilibulo kuti uuli onse uwa ifwe mu cine cine alishingamwa, nangu fye ababusu na bana banono mu cilonganino. Ku ca kumwenako, bushe icilonganino cenu calikwata ukusuminishanya kwaimikwa ukwa kulatumako ubwingi bwashininkishiwa ubwa ndalama ku Sosaite cila mweshi?

⁵ Imitubululo ishaiwamina iyapeelwa pali 1 Abena Korinti 16:2 isuma ukuti twalangulukapo. Na kuba, ukulingana na Malaki 3:10, tatwingenekela ipaalo lya kwa Yehova kano nga twayafwilisha ukupepa kwakwe ukwa cine mu fya ku mubili. Ilintu Yehova tafwaya ifya pe kumi ukufuma kuli ifwe, umo na umo uwa ifwe alingile ukupeela nga fintu apangile mu mutima wakwe. (2 Kor. 9:6; Luka 16:9, 10) Shi Yehova napaale ukupingulapo kwesu muli kuno kuloshako.