Ukwaafwa Abana Besu Ukwikalilila mu Cine
Ulubali 5: Ukupitila mu Kubombela Capamo
1 Bonse mu cilonganino balingile ukuba abayangwako ukushininkisha ukuti abana besu baikalilila mu cine. Muli luno lubali lwa kulekelesha ulwa kuno kukonkana tulefwaya ukulanguluka ifyo bambi aba mu cilonganino bengaafwa abafyashi, maka maka abo bakwata indupwa shikalamba. Twalalanguluka no kukabila kwa kuti indupwa shonse shilepekanishisha ukulongana capamo no kulanshanya ilembo lya bushiku lyonse. Mu kupelako, twalalanguluka icishingamo ico umusepela umo na umo wakwata.
2 Ifyo Wingaafwa: Ni shani nga ca kuti wishi na nyina tabaakosa lwa ku mupashi kabili tabankula na ku kukoselesha kwa baeluda ukwa kutungulula isambililo lya Baibolo ilya lupwa? Nangu ca kuti baeluda te ba kupokolola umulimo wa kukusha abana, kuti bayafwa. Baeluda, ababomfi batumikila, na bakasabankanya bambi abafikapo aba mu cilonganino kuti baipeelesha ukulatungulula amasambililo ya musango yo. Abacaice bonse balingile ukukwata isambililo lya Baibolo ilya lyonse, nangu ca kuti abafyashi babo tabalebasambilisha. Ici cintu cimo ico baeluda balekabila ukulolekeshapo, ukucilisha ilyo baleya ku fipempu fya bucemi pa ndupwa.
3 Nga ca kuti abafyashi balinakuka mu cine, baeluda kuti pambi bapeela kasabankanya umbi umulimo wa kupekanishisha umusepela ku lubatisho. Ici kuti pambi casanshamo ukusambilila impapulo sha kutendekelako ukupitila mwi sambililo lya Baibolo ilya mu ŋanda. Ilyo umusepela watendeka ukufumina mu mulimo, mulingile ukuukoselesha ukulunduluka mu kushikatala ukulola ku kuipeela no lubatisho.
4 Bonse mu cilonganino balingile ukuba abasekelela mu bacaice ilyo tuli ku Ŋanda ya Bufumu. Shininkisha ukuti ulebaposha pa kulongana ukuli konse. Leka bayumfwe ukuti na bo baba lubali lwa cilonganino. Landa na bene ifyo ifintu fileenda ku sukulu, mu butumikishi, nelyo ifintu fimbi. Kwata ubuseko mu cintu bacita. Bakoseleshe ukulenga icine ukuba icabo no kubombela Yehova. Ubuseko bobe muli bene no kukoselesha fikalumya ukubombesha kwa bafyashi ku kubakushisha mu “kufunda no kukonkomesha kwa kwa Shikulu.” (Efes. 6:4) Balungatikeni ku mulimo wa bupainiya ngo buyo bwa mu bumi. Na kabili, itemenweni ukusendako abana mu mulimo. Mu ndupwa shikalamba wishi na nyina te kuti pambi bakumemo ukusenda abana babo bonse pa nshita imo ine. Mu kuitemenwa basendeko pa kuti belayumfwa abapatwa nelyo ukuyumfwa ukuti bali cisendo.
5 Ukupekanishisha Ukulongana Capamo: Cisuma na kabili ukuti indupwa lyonse shilepekanishisha ukulongana capamo, ukusansha kwi sambililo lya Baibolo ilya lupwa. Abafyashi kuti baikala capamo na bana babo no kupekanya Ulupungu lwa kwa Kalinda ilyo lushilasambililwa ku cilonganino. Afweni bonse ukupekanya ifyasuko no kubakoselesha ukwasukapo ku kulongana. Pekanyeni ne sambililo lya Citabo pa Cilonganino. Kuti cawama ukubelenga Baibolo capamo mu kupekanishisha Isukulu lya Butumikishi bwa Teokrasi, no kubelenga ifyebo fimbi ifya mu sukulu no Ukulongana kwa Mulimo. Ici cikaafwa abana benu ukukwata ukutantika kusuma ukwa kusambilila ilyo bakula. Cikabaafwa ukulemenena ku kutontonkanya pa fintu fya ku mupashi no kufulukisha ukubombela Yehova nga umo uwa nte shakwe. Ee, cikabalenga ukufwaisha ukuba bakabilisha ba Bufumu abapimpa.
6 Ukulanshanya Ilembo lya Bushiku ngo Lupwa: Icakatama na cimbi caba kulanshanya kwa lupwa ukwe lembo lya bushiku. Ici cintu calikomailwapo ilingi, lelo te shonse ndupwa ishilecite ci. Ukulanshanya ilembo ulucelo cilengo kuti muletendeka ubushiku bumo na bumo ne fya ku mupashi, lelo nga mwafilwa ukulanshanya ulucelo, kuti mwalanshanya lyene pa nshita imbi muli ubo bushiku. Nga ca kuti wishi talipo nelyo nga te kuti atungulule ukulanshanya, nyina alingile ukucite fyo. Bomfyeni ukulanshanya kwe lembo ku kupekanishisha abana benu ku mulimo na pa numa ku kuipeela no lubatisho. Ukulanshanya kwa musango yo ukwatungululwa bwino kuti kwayambukila mu kushika ukufwaisha kwa ku mutima ukwa bana benu.
7 Imibele Yobe We Musepela: Nga ca kuti uli umo uwa bacaice abashilatendeka ukuya mu mulimo wa kushimikila, tulekukoselesha ukubomba ukulola kuli ubo buyo. Bushe ukufwaisha kobe kwaba kwa kubombela Yehova no kukwata umweo mu calo cakwe icipya? Nga ni fyo itendekeleko no kulanda na bafyashi bobe pa lwa ici. Balombe ukuti bakwaafwe ukafikepo ku kuba kasabankanya. Bombesha kabili lunduluka mu cine pa kuti ukafikepo. Lyene, lintu watendeka, ukacikatamike no kubombako mu butumikishi lyonse. Ba uwalamuka mu kushimikile mbila nsuma pa miinshi, kabili lenga ubuyo bobe bube bwa kwakana mu mbali shonse sha mu butumikishi. Kuti walenga no butumikishi bwa bupainiya ukuba e buyo bobe mu bumi. Nomba e nshita ya kupingulapo ukubombela Yehova.—Luk. Mil. 12:1.
8 Mu kusondwelela, ilintu mu kuswatuka tulefwaisha abali ne nsala ya kumfwe cine mu butumikishi bwesu ubwa Bwina Kristu no kuitemenwa ukutungulula amasambililo ya Baibolo na bene, shi twilekelesha abana ba mu mayanda yesu yene. ‘Ukusunga abantu besu’ caba lubali lwa cishingamo cesu ica Bwina Kristu, kabili ici cisanshamo ukukabila kwa ku mupashi no kwa ku mubili. (Mat. 4:4; 1 Tim. 5:8) Nga ca kuti abafyashi babombesha, ukubikapo no kwaafwa kwa baeluda na bakasabankanya bambi abafikapo, kuti bashintilila pali Yehova ukupayanya ubutungulushi no kupaala ukubombesha kwabo ukwaswatuka. Twalyebekeshiwa mu Malembo pa Amapinda 22:6 ukuti “Kanshisho mwaice umo afwile ukubela, [ukusanshako ukuba kasabankanya wa Bufumu] ilyo akakota takafumemo.”