Endeleni mu Kutetekela
1 Amamilioni ya bantu bayangwa apakalamba ifikwatwa fyabo ifya ku mubili, mu butumpe ukucetekela mu longolo lwa fyuma. (Mat. 13:22) Beluka mu kucelwa nga nshi lintu ifyuma fyabo fyaluba nelyo ukwibwa nelyo lintu fyafilwa ukubanonsha. Tulacincishiwa ukukonkelela inshila ya mano, ukutukutila ifyuma fya ku mupashi. (Mat. 6:19, 20) Ici cibimbamo ‘ukwendela mu kutetekela.’—2 Kor. 5:7.
2 Ishiwi “icitetekelo” lyapilibulwa ukufuma kwi shiwi lya ciGriki ilyo lilondolola itontonkanyo lya kucetekela, ukushininkisha mu kushangila. Ukwendela mu kutetekela cipilibula ukulolenkana ne mibele yayafya mu kuba no kucetekela muli Lesa, ukucetekela mu maka yakwe aya kushikimike ntampulo shesu na mu kuitemenwa kwakwe ukwa kusakamana ifyo tulekabila. Yesu aimike ica kumwenako capwililika; atontomeshe pa fyali ifyacindama mu cine cine. (Heb. 12:2) Mu kupalako, tulekabila ukutontomesha imitima yesu pa fintu fishimoneka, ifya ku mupashi. (2 Kor. 4:18) Lyonse tulekabila ukuba abaibukila ulwa kupelebela kwa bumi bwesu ubwa ndakai no kwishiba ukuti twashintilila pali Yehova umupwilapo.
3 Na kabili tulekabila ukushininkisha mu kushangila ukuti Yehova aletutungulula ukupitila mu kuteyanya kwakwe ukumoneka pe samba lya butungulushi bwa “musha wa cishinka kabili uwashilimuka.” (Mat. 24:45-47) Tulalangisha icitetekelo cesu lintu ‘twaba aba cumfwila ku baletutungulula’ mu cilonganino. (Heb. 13:17) Ukubombela pamo no kuteyanya kwa teokrasi mu kuicefya kulangilila ukucetekela kwesu muli Yehova. (1 Pet. 5:6) Tulingile ukukuntwa ku kwafwilisha no mutima onse umulimo untu ukuteyanya kwapeelwa ukucita. Ici cikatupalamika kuli bamunyinefwe mu cikakilo cakosa ica kutemwa no kwikatana.—1 Kor. 1:10.
4 Ifya Kukosha Icitetekelo: Tatufwile ukusuminisha icitetekelo cesu ukwiminina shilili. Tulekabila ukulwisha na maka ukucikosha. Isambililo lya lyonse, ipepo, no kulongana fikatwaafwa ukukosha icitetekelo cesu pa kuti, mu kuba no kwaafwa kwa kwa Yehova, kuti cacincintila ica kwesha icili conse. (Efes. 6:16) Bushe mwalitantika bwino ukubelenga Baibolo lyonse no kupekanishisha ukulongana? Bushe ilingi line muletetula pa fintu mwasambilila, kabili bushe mulatununuka Yehova mwi pepo? Bushe caliba cibelesho cenu ukusangwa ku kulongana konse no kwasukapo ilyo kwabako ishuko?—Heb. 10:23-25.
5 Icitetekelo cakosa cishininkishiwa ku milimo isuma. (Yako. 2:26) Imo iya nshila shawamisha isha kulangilamo icitetekelo cesu ya kubilisha isubilo lyesu kuli bambi. Bushe mulasangako utushita twa kushimikilamo imbila nsuma? Bushe imibele yenu kuti yateululwa ku kumulenga ukuba na maka ya kubomba ifyafulilako mu butumikishi? Bushe mulabomfya imitubululo iyo tupokelela ku kuwamyako mu mibombele yesu iisuma no kubombesha mu butumikishi? Bushe mulaimikila amabuyo ya ku mupashi aya pa lwenu no kupilikita mwe bene pa kuti mufikepo?
6 Yesu asokele pa lwa kobelwa mu mibele ya cila kasuba iya bumi no kusuminisha amabuseko ya kutemwa ifikwatwa nelyo aya kaso ukulenga imimwene yesu iya ku mupashi ukushibantukila. (Luka 21:34-36) Tufwile ukumona ifyo twenda pa kuti twingasengauka ukubunsha ubwato bwa citetekelo cesu. (Efes. 5:15; 1 Tim. 1:19) Ifwe bonse tusubila ukuti mu kupelako tukaba na maka ya kubilisha ukuti ‘natupilikito kupilikita kusuma; natupwisho lubilo; natubake citetekelo.’—2 Tim. 4:7.