Ukubilisha

◼ Ulupapulo lwa kutambika mu January: Ifitabo fya mabula 192 ifili fyonse ifyasabankanishiwe pa ntanshi ya 1984 ifyo icilonganino cikwete pamo nga Insansa—Ifya Kushisanga, “Ubufumu Bwenu Bwise”, Ukupusunsuka Ukwingila mwi Sonde Lipya na Ukukutika kuli Kasambilisha Mukalamba. Ifi fitabo kuti fyatambikwa pa musangulo wa lyonse uwa K1,000.00. Ifilonganino ificili nafikwata Abaikatana mu Kupepa Lesa Umo Eka Uwa Cine nelyo Ukulenga Ubumi bwa Lupwa Lobe ubwa Nsansa kuti fyatambika ifi pa musangulo wacefiwako uwa K700.00. Nga ca kuti ifilonganino tafikwete ifi fitabo kuti fyaorda ku Sosaite pali formu wa Literature Request (S-AB-14) uwa lyonse. February: Ukusokolola—Akalume ka Kuko Kakalamba Nakapalama! March: Icaba Inkaama ku Nsansa sha Lupwa. April: Kampeni wa kulembesha Ulupungu lwa kwa Kalinda.

◼ Bakasabankanya babatishiwa bonse abakasangwa pa Ukulongana kwa Mulimo mu mulungu wa January 6 bakapeelwa kardi wa Advance Medical Directive/Release na Identity Card wa bana babo.

◼ Ukutendeka na February, kabili te kucila pa March 2, ilyashi lya cintubwingi ilipya ilya bakangalila ba miputule likaba “Bomfyeni Amasomo ku Kulumbanya Yehova.”

◼ Ifilonganino filingile ukutantika bwino bwino ukusefya Icibukisho uno mwaka pa Mulungu, March 23, pa numa ya kuwa kwa kasuba. Nangu cingati ilyashi nalimo kuti lyatendeka mu kubangilila, ukupishamo ifimpashanya fya Cibukisho takulingile ukutendeka ukufikila pa numa ya kuwa kwa kasuba. Ipusheni ababa mu cifulo cenu ku kwishiba inshita akasuba kakawa mu ncende yenu. Apantu takuli kulongana ukuli konse ukufwile ukubako pali bulya bushiku pa mbali ya mulimo wa mwi bala, mulingile ukuteulula isambililo lya Ulupungu lwa kwa Kalinda ukutungululwa ubushiku bumbi. Bakangalila ba miputule bakakabila ukuteulula imitantikile yabo iya kulongana muli uyo mulungu ukulingana ne mibele ya mu cilonganino balebombelamo. Nangu cingati cilafwaikwa ku cilonganino cimo cimo ukuikwatila Icibukisho abene, nalimo ici te lyonse cingacitika. Uko ifilonganino fyafulilako babomfya Iŋanda ya Bufumu imo ine, nakalimo icilonganino cimo nelyo ifyafulilako kuti bayashima icikuulwa cimbi ica kubomfya ico cungulo bushiku. Icibukisho tacilingile ukutendeka ubushiku sana ica kuti abapya abalesekelela bacisanga ukuba icayafya ukusangwako. Kabili imitantikile tailingile ukuba iyatitikana nga nshi ica kuti takuliko ne nshita ya kuposha abatandashi ilyo Icibukisho tacilatendeka na pa numa, inshita ya kutantikila abalesekelela ukwafwilisha kwatwalilila ukwa ku mupashi, nelyo iya kuipakisha ukukoseleshanya. Pa numa ya kulanguluka imbali shonse, baeluda balingile ukupingulapo imitantikile ikaafwa bwino nga nshi abalesangwa ku Cibukisho ukunonkelamo mu kufikapo muli ici ca kucitika.

◼ Ilyashi lya cintubwingi ilyaibela ilya 1997 mu nshita ya Cibukisho likalandwa pa Mulungu, April 6. Autulaini akapayanishiwa. Ifilonganino ifyo fikwete ukutandala kwa kwa kangalila wa muputule, ukulongana kwa muputule, nelyo ubushiku bwa kulongana kwaibela iyo mpela ya mulungu fikakwata ilyashi lyaibela umulungu ukonkelepo. Takuli cilonganino icilingile ukukwata ilyashi lyaibela pa ntanshi ya April 6.

◼ Ibumba lya baeluda lilingile ukuba ilyaibukila ukuti ukuteulula kwakonkapo kulakabilwa lintu icilonganino cilesangwa ku kulongana kukalamba mu ncende ya ciko: Lintu programu wa bushiku bwa kulongana kwaibela atantikwa, icilonganino cilingile ukukwata ukulongana konse ukwa lyonse ukupulinkana umulungu onse, kano fye Ukulongana kwa Cintubwingi ne Sambililo lya Ulupungu lwa kwa Kalinda e fifumishiwako. Lintu icilonganino catantikilwa ukusangwa ku kulongana kwa muputule, na kabili cikafumyapo Isukulu lya Butumikishi bwa Teokrasi na Ukulongana kwa Mulimo; kano fye Isambililo lya Citabo pa Cilonganino elikabako muli ico cifulo uyo mulungu.

◼ Umuputule wa Fitabo nomba nawisulwa pe Ofesi lya Musambo ilya kale ilya Sosaite mu Northumberland Avenue, Kitwe. Ubomba ulucelo pali Cimo, pali Citatu na pa Cibelushi epela. Twapaapaata mwiisa pa nshita iili yonse imbi ukwenekela ukumushitisha ifitabo pantu tapakabe uuli onse uwa kumwaafwa. Tulesubila ukuti iyi mibombele ipya mu kushininkisha ikanonsha bamunyina ku Copperbelt na bambi abengapita mu Kitwe limo limo. Bapainiya bakafwaikwa ukulangisha ama identity card yabo pa kushita ifitabo na bamagazini pa mutengo wa bupainiya.

◼ Cila mwaka mu December kulabako imitantikile ya kuti baeluda bakumanya bapainiya. Uku kukumana ukucilisha kwapekanishiwa ku kukoselesha no kwafwilisha bapainiya mu butumikishi bwabo. Bushe mwalitungulula uku kukumana mu cilonganino cenu kale kale? Nga te ifyo, twapaapaata tantikileni uku kukumana, mwalicelwa umweshi umo ukulingana no kutantika.

◼ Impapulo Shilipo:

Abateyanishiwa ku Kupwilikisha Ubutumikishi Bwesu—Icichewa

Imbileni Yehova Amalumbo (icinono)—IciNgeleshi

Trakiti Na. 22—Icibemba, iciNgeleshi