Lumbanyeni Yehova

¹ Bushe ukwimba kwacindama shani mu kupepa kwa muno nshiku? Ni shani fintu abantu ba kwa Yehova ilelo bengamutemuna ukupitila mu kusansula amashiwi yabo mu kwimba? Lubali nshi inyimbo shilingile ukukwata mu kupepa kwa cine? Ulupungu lwa kwa Kalinda ulwa February 1, 1997, lwalondolwele ifyasuko kuli ifi fipusho fya kubimbula itontonkanyo mu cipande caleti, “Ulubali lwa Nyimbo mu Kupepa kwa Muno Nshiku.”

² Ukwimba ca bupe ukufuma kuli Lesa. Ukusansula amashiwi yesu mu kwimba kuti kwatuletela ubuseko no kutemuna Kabumba wesu. Ukupitila mu kwimba, kuti twalumbulula ukutemwa kwesu, ukushinshimuna, no kulumbanya Katendeka wa nyimbo, Yehova.

³ Pa kuti cingatwaafwa ukupekanya no kwimbako no mutima onse pa Mabungano ya Citungu aya uno mwaka aya “Tetekeleni Icebo ca kwa Lesa,” Sosaite naisala inyimbo shakonkapo ishili no kubomfiwa: 4, 10, 13, 43, 46, 77, 98, 130, 138, 144, 155, 156, 160, 164, 180, 183, 191 na 195.

⁴ Ukwimba no mutima onse kuti kwatulenga ukuba ne tontonkanyo lisuma muli programu kabili kuti kwatucincisha ukubombesha apakalamba mu kupepa Yehova. Muli ifyo, tulekoseleshiwa ukusambilila libela ishi nyimbo, pa kuti twingamona ukuti ishuko lyesu ne cishingamo cesu ica kwimba fyalikatama.