Mulandu Nshi Tulingile Ukusungilila Ubusaka pe Bungano Lyesu?

¹ Ubutumikishi Bwesu Ubwa Bufumu ubwa March 1997 bwakwete icipande pa lwa busaka. Amaparagrafu 12 ukufika ku 14 yatucinkwileko ukuti tukabila ukusungilila ifipimo fyasumbuka ifya busaka pa mabungano yesu. Cino cipande cilimo ifya kucinkulako finono. Ibukisheni ukuti, ukusungilila icifulo ce bungano ica busaka te cishingamo ca dipartimenti wa busaka, ifwe bonse tulakabila ukubombela pamo no yu dipartimenti.

² Icifulo ce bungano tacifwile kubamo ifiko. Bamunyina balabombesha nga nshi ukupekanya ififulo fye bungano no kufiwamya ilyo ibungano lishilatendeka. Nangu cibe fyo, ku mabungano ya ku numa kwalebako ubwafya bwa kupoosaika ifisooso kuli abo basangilweko. Icili conse ico twaleta mu cifulo ce bungano cilingile ukufumishiwamo, ukusanshako ifya kusendelamo fyabulamo akantu, amabotolo, na fimbipo. Nga kuti twafileta mu cifulo ce bungano lintu filimo ifya kulya, lyene ukwabula ukutwishika kuti twafisenda lintu mushili kantu nangu kamo. Kuti pambi natufwala ifya kufwala ifisuma, insapato ishisuma no kuba ne finso fyayemba, lelo nga ca kuti twikele mu fiko, bushe mu cituntulu tuli aba busaka?

³ Pa mabungano yamo indupwa shilila ifya kulya mu cifulo ce bungano. Ici cili fye bwino, lelo tatulingile ukupoosaika ifyashalapo insansalila ukufikila programu apwa. Pa numa ya ca kulya ca kasuba ulupwa lumo lumo e lwashingamwa ukupoosa ifisooso ifili fyonse ifyo bashile. Ifwe bonse tufwile ukuwamyako pa lwa ici. Incende shiliilamo indupwa ishingi shiba kwati nalimo pantu balelishisha inyimbo sha rock. Paba amabotolo, inciliko sha pa mabotolo, ubufungau bwa fya kulya, baplastiki, amapepala ya ku cimbusu na maprogramu fye ya kulongana nafibashinguluka kabili balemoneka kwati tabeshibe ifiko ifyo bapoosaike. Pa numa ya ca kulya ca kasuba, natutoole ifili fyonse ifili mupepi na ifwe no kufipoosa. Nakalimo kuti mwatemwa ukusenda plastiki uyo ulupwa lwenu lwingalapoosamo ifiputusha fya fya kulya, inciliko sha pa mabotolo ne fisooso fimbi pa kuti fingapooswa mu ng’ungulu nelyo icilindi cipayanishiwe pe bungano. Takuli ifisooso filingile ukushala kabili tulingile ukutwala amabotolo yonse ku kaunta ukwa kushitila ifya kunwa fyatalala ilyo ibungano lishilatendeka icungulo. Twapaapaata mwipoosaika amabotolo mupepi apo mwikele, kuti yalenga ubusanso kabili tayamoneka bwino ukuloleshapo.

⁴ Nga ca kuti namukwata ing’anda nelyo umwa kwikala pe bungano, shininkisheni ukuti incende intu mwikelepo ili iyapempenkana. Abana kuti bakanshiwa ukupyanga no kupoosa ifisooso ku cifulo cipekanishiwe ukwa kupoosa ifisooso.

⁵ Ni shani pa lwa busali? Pa kulongana kumo nelyo ififulo fye bungano, ubwafya bukalamba buba ku bantu, ukwa kupoosela ubusali. Ifimbusu filabipisha nga nshi ica kuti te kuti fibomfiwe. Icitabo ca Insansa sha Lupwa cilondolola ukuti: “Ifunde limo ilya musango yo lyakumine ku kupoosa ubusali bwalefuma mu bantunse, ubwali no kushiikwa bwino ukutaluka ku nkambi pa kuti incende ukwaleikala abantu taisafiwe. (Amalango 23:12, 13) Lilye funde lya pa kale na nomba line lyaliba kufunda ukusuma. Nangu fye ni lelo abantu balalwala no kufwa pa mulandu wa kuti tabalikonka.” Ifimbusu, napamo fya kwimba nelyo ifya kukumpa, filapayanishiwa pa fifulo fye bungano. Takuli nangu umo uufwile ukusunsumana ku nse, no kusha ubusali ubwabula ukushikwapo. Ubu buba busanso ku bumi lintu abantu abengi nge fyo balongene capamo mu ncende inono. Ukulundapo, ubusali bulanunka kuli Yehova na ku bantu. Yehova atila akatutaluka nga ca kuti amona ica makankamike muli ifwe. (Linganyeniko Amalango 23:14.) E ico, cili ice pamfya ukuti twatwalilila ukuba aba busaka pa kuti inshila yesu iya bumi yalingana ne fipimo fyakwe. Shi ifwe bonse natutukushe ukutwalilila ukuba aba busaka lwa ku mubili no kusungilila icifulo tuleikalamo icishakowela, pa kuti Yehova ‘ekamona muli ifwe ica nsoni.’

⁶ Tufwaya ukuba aba cilumba pa lwa fifulo fyesu ifya kulonganinapo. Ukutula nomba ukuya na ku ntanshi, shi ifwe bonse natubombeshe ukuti “tuisangulule ku kukantana konse kwa mubili no mutima, tube abafishisho mushilo mu kutiina Lesa.” (2 Kor. 7:1) Belesheni ubusaka pa ng’anda pa mwenu, ukukansha abana benu ukubombako umulimo wa kusungilila ing’anda iya busaka. Belesheni ubusaka pa Mayanda yesu aya Bufumu kabili lintu twalongana capamo pa mabungano yakalamba nelyo pa kulongana kukalamba, shi ukulongana kwesu nakuletungilila ifipimo fyasumbuka ifya kwa Yehova Lesa wesu uwa mushilo.