“Yehova E Kaafwa Wandi”
1 Lintu Yesu atumine abasambi bakwe aba kubalilapo, abebele ati: “Moneni, ine ndemutuma nge mpaanga mu kati ka mimbulu.” (Mat. 10:16) Bushe co calibatiinishe no kubalenga ukukwinda? Awe. Bakwete imibele iyo umutumwa Paulo alumbulwile lintu aebele Abena Kristu banankwe pa nshita imbi ati: “[Beni abakosa no kusosa amuti, NW], Shikulu [Yehova] e kaafwa wandi, nshakatiine. Bushe umuntu engancita nshi?” (Heb. 13:6) Basekelele pa kulingilwa abawamino kucendelwa ishina lya kwa Yesu, kabili batwalilile no kukanaleka ukusambilisha no kubila imbila nsuma.—Imil. 5:41, 42.
2 Lelo, umulimo wa kushimikila isonde lyonse ufikile ku mateelo. Tuli abapatwa ku nko shonse, nga fintu Yesu asobele. (Mat. 24:9) Abantu balilwisha umulimo wesu uwa kushimikila no kuupumya, e lyo mu fyalo fimo, walibindwa fye no kubindwa. Atubule citetekelo, nga twalitiinishiwa. Nangu cibe fyo, ukwishiba ukuti Yehova ni Kaafwa wesu cilatupembesula no kutukosha ukuti tushipikishe.
3 Ukukosa mibele ya kushipa, ukupambana. Capusana no mwenso, insoni, bukuuwe. Abasambi ba kwa Yesu lyonse baakabila ubukose pa kushipikisha. Bulafwaikwa nga tatulefwaya imitima yesu ukusunguluka ku mibele ne ncitilo sha ba pano isonde ababa balwani ba kwa Lesa. Fintu tukoseleshiwa nga twatontonkanya ica kumwenapo capulamo ica kwa Yesu, uwacimfishe aba pano isonde! (Yoh. 16:33) Na kabili, ibukisheni abatumwa, abasosele mu kushipa ilyo bali mu mesho yabipisha ati: “Tuli no kunakila Lesa ukucilo kunakila abantu.”—Imil. 5:29.
4 Tatuli Abakwinda: Tufwile ukutukuta ukusungilila imibele isuma ukulola ku mulimo wesu. (Heb. 10:39) Lyonse muleibukisha ukuti tutumwa na Yehova pantu e nshila yakwe iya kulangilamo ukutemwa ne nkumbu ku bantu bonse. Tatuma ababomfi bakwe ukucita icili conse icabule mifwaile ine ine. Conse ico twatumwa ukucita kwi pele pele cikawamina abatemwa Lesa.—Rom. 8:28.
5 Ukushininwa ukuti mukafume fisuma kukatwaafwa ukutwalilila ukufwaya abapale mpaanga mu cifulo tubombelamo. Imisuula abantu balangisha kuti twaimona nga iletulanga ifyo bafulunganishiwa no kupelelwa. Lekeni ukutemwa kwesu kutulenge ukubalangulukilako no kubateekanishisha. Ilili lyonse twashalika ulupapulo nelyo ukumona akabuseko kanono, ubuyo bwesu bulingile ukuba bwa kubwelelako bwangu bwangu no kukusha ako kabuseko. Tatufwile ukuitwishika ukuti tatwingatendeka isambililo lya Baibolo nelyo ukuti tapali uko tukafika nalyo. Lelo tulingile lyonse ukulomba Yehova ukuti atwaafwe no kututungulula, no kucetekelo kuti akatwaafwa.
6 Twalicetekela mu kukosa ukuti Yehova akaba no yu mulimo ukufika na ku mpela. (Linganyeniko Abena Filipi 1:6.) Ukumucetekela twamucetekela umupwilapo ukuti e Kaafwa wesu kulatukosha, ica kuti “[tatunenuka] mu kucite cawama.”—Gal. 6:9.