Umupashi wa kwa Yehova Waba na Ifwe

¹ Pamo nge Nte sha kwa Yehova, twalipeelwa umulimo ukalamba. Yesu atile: “Imbila nsuma ili no kubililwa kabela ku nko shonse.” (Marko 13:10) Ukucimwena mu fyo abantunse bengacimona, ici te kuti cicitike, lelo te fyo caba. Twalikwata amaka yalumisha mu kubumbwa konse ayaletutungilila—na ya maka mupashi wa kwa Lesa.—Mat. 19:26.

² Ubushinino bwa mu Mwanda wa Myaka uwa Kubalilapo: Ukulosha ubusesemo bwa kwa Esaya ku mwine, Yesu atile: “Umupashi wa kwa Shikulu waba pali ine . . . ku kubile mbila nsuma.” (Luka 4:17, 18) Ilyo ashilaya ku muulu, aebele abatumwa bakwe ukuti na bo bene umupashi wa mushilo ukabalenga ukushimikila “ukufika ku mpela ya pano nse.” Pa numa ya ico, umupashi wa mushilo watungulwile Filipi ukushimikila mutungwi umwina Etiopia, umupashi watumine Petro kuli mushika wa ciRoma, kabili watumine Paulo na Barnaba ukuyashimikila ku Bena fyalo. Nani watontonkenyepo ukuti abantu ba fikulilo fya musango yu kuti baumfwe cine? Lelo balyumfwile.—Imil. 1:8; 8:29-38; 10:19, 20, 44-48; 13:2-4, 46-48.

³ Ubushinino bwa Nomba: Ibuuku lya Ukusokolola likomaila pa lwa fyo umupashi wa mushilo waibimba mu mulimo wa kushimikila ilelo ukupitila mu kusosa ukuti: “Umupashi na Nabwinga batila, Iseni: . . . Uulefwaya abuulepo ica bupe amenshi ya Mweo.” (Ukus. 22:17) Umupashi walilenga ibumba lya kwa nabwinga wa kwa Kristu ne fibusa fyabo “impaanga shimbi” ukushimikila imbila nsuma ku bantu bonse. (Yoh. 10:16) Tufwile ukushipa mu kushimikila kwesu, ukukanashingashinga ukulanshanya na bantu ba misango yonse, abashininkisha lyonse ukuti umupashi wa kwa Lesa ukatwaafwa. Ubushinino bwa kuti umupashi wa kwa Lesa uletwalilila ukuba na babomfi bakwe kuti bwasangwa muli 1998 Yearbook. Moneni ifya kufumamo! Mu myaka ibili iya mulimo iyapitapo, nga kwakanya pa bushiku bumo bumo, ukucila pali 1,000 e balebatishiwa cila bushiku.

⁴ Cetekeleni ukuti umupashi wa kwa Lesa ukatwalilila ukuba na ifwe ilyo tuleshimikila ubukombe bwa Bufumu ukufika apo Yehova alefwaya. Uku kwishiba kufwile ukutukoselesha no kutulenga ukutwalilila ukupilikita mu mulimo wa Bufumu uwacindamisha.—1 Tim. 4:10.