Bushe Kuti Twacilapo Ukwaafwa?

¹ Ukutantika kwa kwaafwa ababulisha ukukwata Ulupungu lwa kwa Kalinda nelyo icitabo ca pe Sambililo lya Citabo pa Cilonganino kwabomba mupepi ne myaka ibili. Ulupwa lumo na lumo lyonse lupokelela Ulupungu lwa kwa Kalinda ne citabo cimo ica kubomfya bonse ukwabula ukusangwilako akali konse. Ishi mpapulo shilipililwa shani? Kupitila mu misangulo ya kuitemenwa ukufuma ku bengaafwa. Inshita shimo na baafwiwa bene balasangwilako. Ku ca kumwenako, nkashi umo uuli mutwe wa ng’anda yakwe alembele ukuti, “Ndelemba ukumutasha pali bukapekape bwa ba Sosaite ku babulisha. Lyonse ndapokelela magazini wa Ulupungu lwa kwa Kalinda uwa kubomfya pe sambililo lya cila mulungu pamo ne citabo ca nomba ica kubomfya pe Sambililo lya Citabo pa Cilonganino. Lintu ifilimwa fyandi fyakulile, nalangilile ukutasha kwandi ukwa kufuma pa mutima ukupitila mu kusangwilako K25,000.00 mu kutungilila uku kutantika.”

² Mu mwaka wa 1997 bamagazini 166,870 ne fitabo 318 fyalituminwe ku kwaafwa ishi ndupwa ne ndalama shapooselwe shali K33,692,000.00. Imisangulo yafumine ku filonganino yafikile pali K2,585,502.00, ukupilibula ukuti amaperesenti fye 8 e yo tusangwilako mu calo cesu. Bamunyinefwe mu fyalo fimbi e balesangwilako amaperesenti 92. Bushe muletontonkanya ifyo kuti mwacilapo ukwaafwa? Aba te bamunyinefwe mu citetekelo fye lelo bekala calo banensu, aba mu filonganino fyesu, aba mu lupwa ne fibusa. Inshita shimo tulaba fye kabili tukabila ukucinkulwako, lelo twalishininwa ukuti ifilonganino muno calo cesu kuti fyasangwilako isho ndalama shonse mu cifulo ca kulolela ukwafwiwa ne filonganino fya mu fyalo fimbi. Kale kale bamunyinefwe mu fyalo fimbi fingi balecita ku kutungilila umulimo muli cino calo pamo no kupayanishisha imbutushi ifya kukumbusuka na bambi abasanswa ku fintu pamo nga ifinkukuma, ifipowe na fimbipo. Cine cine te kuti twenekele bena na kabili ukutushitila impapulo.

³ Bushe kuti twacilapo ukwaafwa? Icilonganino cimo na cimo calikwata akabokoshi ka misangulo apo bashitishisha impapulo na bamagazini kabili imisangulo ipokelelwa itumwa ku Sosaite pa mweshi. Indupwa ishingi shalipingulapo ukusangwilako indalama sha magazini umo cila nshita lintu shashita bamagazini ba shiko. E fyo shicita na lintu shashita icitabo cipya ica kubomfya pe Sambililo lya Citabo pa Cilonganino. Mu mashiwi yambi shilashitilako ulupwa na lumbi. Muli uyu mulandu “onse acite umo apangile mu mutima wakwe.”—2 Kor. 9:7.