Umukululo wa Fipusho

◼ Bushe mulakabila ukupoka kalata?

Umukululo wa Cipusho mu Ubutumikishi Bwesu Ubwa Bufumu ubwa February 1991, paragrafu ya kubalilapo watile: ‘Lintu fye kasabankanya afika ukufuma ku cilonganino cimbi, kalemba wa pa cilonganino afwile ukupoka ukufuma kuli kasabankanya ishina lya cilonganino uko afumine, ne shina na keyala ifya kwa kalemba wa cilonganino ico kasabankanya afumineko. Lyene kalemba afwile ukulembela kalemba wa cilonganino ukufumine kasabankanya ukumweba ukutuma Icalembwa ca kwa Kasabankanya ica Cilonganino na kalata wa kwishibisha kasabankanya ku cilonganino. Kalemba uulepokelela uyu kalata afwile ukwankulako ukwabulo kushingashinga.’—Moneni Abateyanishiwa ku Kupwilikisha Ubutumikishi Bwesu, amabula 104-5.

Ukulembela bakasabankanya amakalata, abashikuukile ukuya mu kwikala ku cilonganino cimbi lelo abaya fye ku kutandala pa nshiku shimo nelyo imilungu inono, takukabilwa. Ukulembela amakalata bakasabankanya abashikuuka kuba fye cisendo kuli kalemba wa cilonganino. Aya makalata tayafwile ukulalembwa. Kalata wa kwishibisha kasabankanya ku cilonganino tapeelwa kuli kasabankanya uulekuuka, lelo atumwa ku cilonganino ukwakuukila kasabankanya capamo na Icalembwa ca Bukasabankanya ica Cilonganino, lintu kalemba wa ku cilonganino ukwakuukila kasabankanya alembela kalemba wa ku cilonganino afumineko.

Lintu kwaisa umuntu mu cilonganino uuleitunga ukuti ni umo uwa Nte sha kwa Yehova, ukufwaya ukumwafwilisha mu fya ndalama nelyo ifipe fimbi, baeluda balingile ukufwailisha bwino pa lwa uyo muntu. Ukwaafwa kukabilwa pa kubomba bwino no muntu wa musango yo kwalilondololwa mu Ubutumikishi Bwesu Ubwa Bufumu ubwa February 1994, ibula 7, pa mutwe wa kuti: “Cenjeleni ku Cikuuku Calubana.”