Ukwibukishe Mfwa ya kwa Kristu Ukwa mu Calo Conse
1 Yehova alitupeela ifya bupe ifingi nga nshi. Ubusuma bwakwe bonse no kusenamina fyalondololwa bwino ukuti fyaba “ca bupe cakwe icishingalandwa!” Cine cine, ‘ukusenamina kwa kwa Lesa’ kwaliwamisha nga nshi ica kuti tatwingakulondolola.—2 Kor. 9:14, 15.
2 Ica Bupe Cakwe Icakulisha: Yesu Kristu, Icilubula ca bantunse, e ca bupe cakulisha pali fyonse. Ku kulanga ifyo atemenwe nga nshi aba pano isonde, Yehova apeele Umwana wakwe uwatemwikwa kabili uwafyalwa eka. (Yoh. 3:16) Ipaalo lya kwa Lesa ilya musango yo ilyo tushawaminwe na kukwata, lyalinga ukwibukisha mu calo conse. Ukulibukisha lilali kabili mu nshila nshi? Icungulo bushiku pali Cine, April 1, 1999, Abena Kristu mu calo conse bakalaibukisha Umulalilo wa kwa Shikulu, ukucita Icibukisho ce lambo lyacila amalambo yonse.—1 Kor. 11:20, 23-26.
3 Kristu atufwilile “ilyo twali tucili ababembu,” kabili kuti twalangisha ifyo tutasha pa lwesu nga twasangwa ku Cibukisho ca mfwa yakwe no kulaalikako bambi ukwisasangwa kuli ilya nshita yacindamisha nga nshi.—Rom. 5:8.
4 Icintu Cacindamisha: Ukwibukisha imfwa ya kwa Kristu kukomaila sana pa kuti alisumbwile bumulopwe bwa kwa Lesa ukwabula ukutena. Kutwibukishako no kuti kuti twaiminina pa cinso ca kwa Yehova abasanguluka nga twatetekela ilambo lya kwa Yesu, muli fyo ukucetekela ukwisapusuka. (Imil. 4:12) Ici cine cine, e cintu cacindamisha mu mwaka!
5 Kuti twalangishe fyo twalitemwa abanensu nga twabalaalika ukwisasangwa ku Mulalilo wa kwa Shikulu. Iminshipendwa ya bantu abasambilila umutengo wa cilubula uwapulamo na bo kuti bamwenamo. (Fil. 3:8) Abatetekela ilambo lya kwa Kristu kuti banonka isubilo ilituntulu ilya mweo wa muyayaya.—Yoh. 17:3.
6 Inshita ya mwaka iya Cibukisho itupeela amashuko yaibela aya kulangisha ukutasha kwesu pa kusenamina kwapulamo Lesa atusenamina. Iyi e nshita yawamisha nga nshi iya kushimikilako imbila nsuma ya Bufumu bwa kwa Lesa mu kupimpa. Bonse abatontonkanyapo no kupepelapo pa ca bupe ca kwa Yehova icishingalondololwa no kupekanya ukuti bakasangwe ku Mulalilo wa kwa Shikulu uwa uno mwaka bakamwenamo icine cine ku ntanshi!