Tulesekelela pa Kulunduluka

Ilyo umwaka wesu uwa mulimo muno Zambia wapwile, impendwa ipya iya bakasabankanya abatumine amalipoti yali 107, 233. E kutila bakasabankanya nabalundwako amapesenti 5 ukucila ifyo bali mu August 1998. Mwandi tulesekelela nga nshi pali uku kulunduluka! Nomba nga kwakana abantu baba muno calo, kasabankanya umo afwile ukushimikila abantu 96. Abantu 7,654 balibatishiwe mu mwaka onse. Iyi e mpendwa yakulisha iya babatishiwe mu mwaka umo ukutula 1970 kabili amasambililo yatungulwilwe yafikile ku mpendwa ipya iya 138, 281. Tulepepa ukuti Yehova akatwalilile ukupaala ukubombesha kwesu ukwa kubilisha Ubufumu bwakwe.

Baeluda, ababomfi batumikila, na bakasabankanya bonse balekoseleshiwa ukutontonkanya pa kubombesha kwaliko pa kuti tufike kuli iyi mpendwa. Bakasabankanya ukucila pali 100, 000 kale kale tuli na bo mu filonganino. Bambi na bo bakulaisa cila mweshi ilyo tuletwalilila ukubomba bwino ubutumikishi bwesu. Nalyo line, ukupekanya bwino umulimo wa mwi bala, capamo no kwafwa kwa cikuuku ku balekabila kwene, fyalicindama pa kuti ukulunduluka kutwalilile. Natucetekela ipaalo lya kwa Yehova ilyacindamisha pa kuti twingatwalilila ukulunduluka.—1 Kor. 3:7.

Baeluda na babomfi batumikila, maka maka bakatungulula ba Masambililo ya Citabo pa Cilonganino, capamo na bakasabankanya bambi abakosoka na bapainiya, nga batwalilila ukubombesha, filya fine babombeshe mu August, ipaalo lishaiwamina ilya kwa Yehova likamoneka pantu bakasabankanya bakatwalilila ukulundwako. Inshita shimo icifwaikwa fye kucinkulako bamunyina mu cikuuku ukuti baleshimikila no kutuma amalipoti. Imitubululo yapeelwe mu ca mu kati ca Ubutumikishi Bwesu Ubwa Bufumu ubwa November 1998, mu lyashi ilyaleti: “Bombeni Bwino mu Butumikishi Bwenu,” ifwile ukutwafwilisha ukuwamyako imibombele yesu no kulasekelela sana ilyo tulemona ifilefuma mu kubombesha kwesu.